Ayaw usa paglingiw

Samtang kamulo og pangita og kasulbaran ang kagamhanan sa dakbayan sa Sugbo sa grabe nga problema sa trapiko palibot sa siyudad, adunay misakdap nga bag-ong ideya sa ulo ni Mayor Michael Rama. Gusto ni Rama nga ibalhin ang City Hall ngadto sa South Road Properties.

Ug samtang nag-aginod karon ang kagamhanan sa siyudad sa Sugbo pagkuha og igong pondo alang sa katukoran sa bag-o nga Cebu City Medical Center, adunay maayong plano ang mayor alang sa karaang City Hall kun madayon gayud ang pagbalhin niini ngadto sa SRP. Gusto niya nga himuon nga museum ang karaan unya nga City Hall.

Apan samtang nagtuyok-tuyok sa ulo sa mayor kining maong mga ideya, maoy sing-al sa kinabag-an nga hinaut unahon sa lokal nga kagamhanan ang pagsulbad sa nag-unang mga suliran sa dakbayan.

 Aniay mga pressing issues nga nagkinahanglan og unang pagtagad sa mayor ug ubang opisyal sa siyudad. Kini sama sa walay kahumanan nga problema sa trapiko nga kada adlaw na nga kalbaryo sa katawhan ning dakbayan.

Ug tungod lagi sa rason nga wala nay government hospital ang dakbayan nga dali rang kadangpan sa mga kabus, angay lamang nga dalion ang pagtukod sa bag-ong CCMC.   

Walay kwestiyon nga maayo kini’ng mga plano ni Rama nga magtukod og moderno nga City Hall sa SRP ug maghimo og usa ka museum nga dugay rang nagkinahanglan ang siyudad. Apan makapaabot kining maong mga proyekto.

Adunay daghang problema sa dakbayan nga angay lamang hatagan og prayoridad. Ug hinaut nga motutok ang lokal nga kagamhanan niini ug dili molingiw ngadto sa ubang proyekto nga dili dinalian.