Maapil-apilon

Kun likayan ni Mayor Mike Rama ang pag-apil-apil sa Citom, posibleng dili ingon ka makalagot ang trapiko sa Sugbo.

Ang iyang nag-umido nga kagustohang maila isip “traffic czar” maoy nakaingon sa daghang eksperimento sa trapiko sa siyudad sa Sugbo nga pulos miresulta sa dakong palpak.

Sama pananglit sa kalit nga pagkahuot sa trapiko sa SM City Cebu niadtong Sabado. Namugna kadto human gi-meeting ni Mike ang mga sakop sa Citom. Human sa meeting, gipang-alihan ang mga lutsanan sa SM nga mimugna hinuon og higanteng problema sa trapiko sa lugar bali’g lima ka oras.

Hangtod karon, wala pa ang bag-ong CCMC building nga iyang gisaad. May patay sa morgue nga napaakan na lang og ilaga sa  ilong. Tungod kini kay ang mayor tua ang focus sa trapiko, wala sa importante sama sa CCMC.

* * *

Nanaghan ang mga hugpong nga buot mosusi sa massacre sa Mamasapano, Maguindanao nga milalas og 44 ka sakop sa PNP SAF.

Adunay Board of Inquiry. Adunay Truth Commission sa Senado, lain pa ang imbestigasyon sa Ubos Balay Balaoranan. Adunay Ombudsman nga mosusi ni suspendidong PNO chief Alan Purisima sa paghimong “special project” sa pagdakop kang Marwan. Ang dili kasaligang MILF naghimo usab og ilang imbestigasyon nga segurong ilimpyo sa ilang grupo. Pagka-Lunes human sa hitabo, gitukod ang Board of Inquiry.

Alang kanako, maayong usahon na lang ang “body” nga mo-imbestigar sa engkuwentro tali sa mga PNP SAF batok sa MILF ug BIFF. Mga tawo nga namatud-an ang ilang katakus nga mahimong gawasnon gikan sa paggawong sa kagamhanan (sama nilang kanhi Supreme Court chief justice Hilario Davide Jr., former SC associate justice Artemio Panganiban, constitutionalist nga si Fr. Joaquin Bernas, ug Obispo Socrates Villegas, ug daghan pa) ang pilion nga mosusi sa kamatuoran.

Mosugyot ko nga i-apil sa investigating panel si Noy Pabling Garcia. Gawas sa iyang taas nga kahibalo sa Konstitusyon, dili maliso ang iyang katakus paglugit sa kamatuoran nga angayang masayran sa katawhang mga Pilipino.

Kay kun daghan ang mo-imbestigar, daghang kamatuoran ang manggawas.

Apan human ning hitabo, nakapangutana ko kun gipahibalo pa unta silang DILG Sec. Mar Roxas ug PNP Acting Chief Leonardo Espina, maingon kaha niadto ang operasyon pagdakop kang Marwan? Moabot kaha og 44 ang makalas nga kinabuhi sa mga operatibang SAF commandos?

Dili seguro. Apan tungod sa ilang pagtago-tago sa operasyon, miresulta sa dugoong engkuwentro ug daghang kinabuhi sa mga maayong amahan ug maayong bana ug maayong mga anak ang nasakripisyo.

Dungan sa pagbangutan, miulbo ang kalagot nganong gitago ni Noynoy ang operasyon sa iyang suod unta nga higalang si Roxas. Iyang gipatigbabaw ang iyang kasuod sa kontrobersiyal ug gihulagway’ng kurakot (ug nanag-iya pa og dakong propriedad) nga PNP chief.