Bayanihong kamatayon
Kun gipahibawo pa sa Special Action Force (SAF) sa Philippine National Police (PNP) ang Moro Islamic Liberation Front (MILF) sa ilang operasyon pagsikop sa Malaysian nga si Abu Marwan o Zulkifli bin Hir, mahimong nalikayan ang duguong pinusilay nga nikalas og 44 ka SAF commandos, 12 ka sakop sa MILF ug lima ka sibilyan sa Mamasapano, Maguindanao.
Apan dako sab ang kahigayonan nga makahibawo si Marwan sa nag-ung-ong nga operasyon batok niya. Labi na kay ang iyang pangabaga nga si Basit Usman lumad nga taga Maguindanao ug maoy kinakusgan nga tighimo og bomba sa MILF sa wa pa siya mobuwag aron pagtabang pagtukod sa Bangsamoro Islamic Freedom Fighters (BIFF). Wa tuoy pinusilay apan wa say Marwan.
* * *
Gipili sa kadagkoan sa SAF ang risgo sa pinusilay. Bisan nahibawo sila nga posibleng di mahigalaon ang reaksiyon sa MILF ug BIFF inig kahibawo sa ilang presensiya sa tungatunga sa ilang teritoryo sa Barangay Tukanalipao. Gipalabi nila ang pagsuway pagkuha ni Marwan.
Ug nilampos sila. Nga kamatuoran sa talagsaon nilang katakos pagkuha sa labing idlas nga target ug pagtuman sa labing lisod nga tahas. Apan mas bangis kay sa ilang gikahadlokan ang gubat nga nibabag sa ilang pagbiya. Nilabaw sa tanan nilang gipangandaman ang pagpanghasi sa hinugpong nga puwersa sa MILF, BIFF ug sa pundok nilang Marwan ug Usman.
* * *
Kun gipahibawo pang militar nga mas suhito sa Maguindanao sa matag lakang sa makuti nga operasyon sa SAF, mahimong nahabolan sila sa mas gamhanang mga armas ug presensiya sa kasundalohan ug napayongan sa mga helikopter nga iggugubat ug busa wa unta mangahas ang MILF ug BIFF pag-apil sa kalihokan nga wa silay labot.
Apan mas daghan nang mahibawo sa plano ug mas dako nang kahigayonan nga mohungaw sa mga gaway nilang Marwan. Way sukaranan ang SAF pagduda sa militar. Samang way rason nga magduda nilang DILG Secretary Mar Roxas ug PNP Chief Leonardo Espina. Di lang ganahang mogawas sa SAF ang tinagoang kasayuran.
* * *
Way sukaranan ang mga huhungihong nga ang P397 milyones nga gipatong sa Estados Unidos sa mga ulo nilang Marwan ug Usman ang nakaaghat sa liderato sa SAF paglawog sa ilang mga sakop sa kakuyaw. Mas katuohan ang lisod lalison nga kahigayonan nga ang SAF matinud-anon sa iyang tahas pagsuong sa tanang kakuyaw aron paghimong mas luwas sa katawhan.
May sukaranan ang awhag nga di tawgong masaker ang nahitabo sa Mamasapano. Ang SAF commandos wa magpatara. Nisukol sa mas daghang puwersa nga naglibot ug nibanhig nila. Timaan sa ilang kaandam bunga sa pagbansaybansay sa modernong kahimanan ug teknolohiya sa gubat sa Estados Unidos: Nilungtad og 11 ka oras ang pinusilay sa wa pa mahutdi og bala. Bayanihon ang ilang kamatayon.
- Latest
