Sa pagkunhod sa presyo sa fuel

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Dako kaayo ang epekto sa kahimtang sa pagpuyo sa katawhan sa higayon nga usbawan ang presyo sa matag litro sa produkto’ng petrolyo kay mosaka man ‘sab dayon ang presyo sa mga nag-unang palaliton.

Ug ang kabus nga katawhan ang masugamak sa kamahal sa presyo mosabot lang gihapon sa katarungan sa mga magpapatigayon nga ang pagmahal epekto kini sa pag-usbaw sa produkto’ng petrolyo.

Ang mga kabus nga gipangita pa ang kuwarta nga ilang ipamalit og kunsumo sa ilang pamilya sa matag adlaw mao gayud ang masugamak sa kamahal sa palaliton.

Adlaw-adlaw sila nga mamalit dili sama sa mga adunahan nga makahimo man sa pagpangompra daan og daghan nga ipundo sa ilang mga refrigerator.

Ang pag-usbaw sa matag litro sa produkto kaniadto mao gayud kanunay ang gihapin nga rason sa mga negoyante sa pagpausbaw usab nila sa presyo sa ilang mga baligya sama sa linata nga pagkaon, sardinas, kape, asukar ug uban pa.

Ang Department of Trade and  Industry (DTI) ingon sa nagpakabuta- bungol lang sa mga bagulbol sa mga tawo nga hilabihan moingon nga dako na kaayo ang pagkunhod sa matag litro sa krudo o gasolina apan walay pagkunhod sa presyo sa mga nag-unang palaliton.

Ang walay pagpakabana sa DTI daw gisundog usab sa buhatan sa Department of Agriculture (DA) kay wala man usab sila mopatuman sa pagpakunhod sa presyo sa produkto’ng agrikultura.

Ang National Food Authority (NFA) miingon nga daghang bugas nga napundo sa ilang mga bodega apan ang mga kabus naglisod usab pagpalit og NFA rice kay pangitaon man ang display sa mga tindahan.