Dili ta magpalupig!

Kun maglugak-lugak ang kagamhanan ug dili mohimo’g aksyon batok sa grupo nga responsable sa pagpamatay sa dul-an sa 50 ka sakop sa PNP Special Action Force didto sa Maguindanao, mosamot nga mag-anad ang grupo nga namanhig kanila niadto’ng Domingo.

Alang kanako angay gayud nga ipaila sa kagamhanan nga mao kini ang labing gamhanan, ug dili kanang mga tawo nga sagad mohimo og krimen diha sa Mindanao. Dili g’yud tukma ang gihimo sa kagamhanan nga pasagdan lang ang mga tawo nga badlongon diha sa Mindanao.

Hinuon, kun duna may kasabotan tali sa kagamhanan ug sa Moro Islamic Liberation Front (MILF), angay usab tingali unta nga mo-coordinate ang SAF kun mosulod sila sa teritoryo sa MILF aron nga dili maa-an nga sila gisulong.

Apan sa akong pagtimbang-timbang, dili g’yud “mis-encounter” ang nahitabo kay ngano’ng gitusak-tusak man nila sa bala ang kalawasan sa mga sakop sa SAF bisan og patay na?

Unya, gihukasan sa gisul-ob nga mga uniporme ang mga patay ug gipanguha ang mga armas ug mga bala, apil pa ang mga antepara nga magamit aron makakita gihapon ang magsul-ob panahon sa kagabhion.

Dili ba sinalbahis na kaayo ang ilang gihimo? Ang mao nga grupo sa SAF mo-serve ra unta og search warrant batok sa langyaw nga “bomb maker” apan matud pa didto midagan sa kampo sa MILF. Ngano’ng didto man midagan?

Ako nga nagtan-aw sa footage sa television ug sa mga hulagway sa nangamatay, nasubo g’yud. Gani si DILG Secretary Mar Roxas nga miadto sa mao nga dapit kaniadto’ng Martes kahilakon kaayo samtang nag-deliver sa iyang mensahe.

Giawhag ni Roxas ang kabanayan sa mga polis nga nangamatay nga inaya-naya ang ilang kaugalingon. Misaad si Roxas nga dili palabyon kini’ng hitaboa ug paninguhaon nila nga madakpan g’yud si Marwan nga usa ka “high profile terrorist.”

Isip DILG Secretary, ubos gihapon ni Mar Roxas ang mao nga mga sakop sa SAF mao nga gipasalig niya nga hatagan gayud og hustisya ang nahitabo sa mga biktima. Awhagon nato ang kadagkoan sa kagamhanan, ilabi na si Presidente Aquino, nga unta mohimo g’yud unta siya og tukma nga aksyon.

Pagka gamay ra niini’ng mao nga grupo nga naghimo og kasamok diha sa Mindanao unya dili sila makahimo og aksyon. Kamo’ng mga buotan nga mga Muslim, tabangi ninyo nga ang Mindanao magmalinawon na.

Mao bitaw nga daghan na kaayo’ng mga Muslim nga ania na manimuyo sa Sugbo kay mingaw ang atong lugar. Kamo diha sa Mindanao, ayaw pagtugot nga adunay inyong mga kadugo nga maghimo’g kasamok.