Yuta

Temang Nalambigit: Kinabuhi, kasegurohan

Kun ikaw usa ka mag-uuma, imong pagaisipon nga usa ka dakong bahandi ang yuta. Sa laing bahin nagsimbolo kini sa kinabuhi o sa proseso sa kinabuhi. Gani ang basahon sa Genesis ang nagpahinumdom kanato: "Sa yuta ikaw gikan ug sa yuta ikaw pauli." Kun kini ang hulagway nga nigawas diha sa imong damgo, mahimong ang maong damgo ang nagdapit kanimo aron ka motunob sa reyalidad sa imong kinabuhi. Nahimo bang mabungahon ang imong kinabuhi? Nahimo ka bang naningkamot nga mapuy-an mo ang kinabuhi ingon sa angay ug sumala sa kabubut-on sa Dios? Imo bang gitugotan nga malubong ang daan nimong pagkatawo aron mahimugso ang bag-ong tawo diha kanimo? Sama sa usa ka patay'ng lawas sa hayop o nadugtang tanom nga kun malubong sa yuta ang mamahimong abono sa ubang mga tanom ug nakapahimsog kanila?