Krimen batok sa mga bata
Mao ni depensa nga mas grabe kay sa orihinal nga atraso nga gusto nilang tabonan. Sa kataposan niangkon si Social Welfare Secretary Dinky Soliman nga may kalambigitan sa pagduaw ni Pope Francis ang ilang pagda sa gatosan ka kabataan ug mga ginikanan sa kadalanan sa Manila ngadto sa luhong beach resort sa Batangas.
Inay mangayo og pasaylo sa nahauna niyang pag-insistir nga naatol lang sa lima ka adlaw nga pagduaw sa Santo Papa ang pagpatuman sa dugay nang programa pagbansay-bansay sa kabos nga kabataan ug mga ginikanan pag-andam nila pagpuyo og disenteng pinuy-anan, nikumpisal si Soliman og mas pait nga kamatuoran--giisip diay sila nga hulga sa seguridad ni Pope Francis.
* * *
Daghang pasumbingay ang giluwatan sa kapolisan ug ubang opisyal sa gobiyerno human sa pagtumaw sa pasiunang kasayoran nga gihipos ang kabataan sa kadalanan nga naagian sa mga motorkada sa Santo Papa. Apan ang ilang tonada pulos nagtumbok sa panginahanglan pagpahugot sa seguridad ni Pope Francis.
Gipanghimakak hinuon nila ang mga pasangil nga gisikop ug gigamitan og puwersa ang mga bata ug gitanggong aron nga di makit-an sa Santo Papa atol sa kinatibuk-an niyang pagduaw. Igo lang niangkon nga naghimo sila og mga lakang aron nga ang kabataan sa kadalanan di maggamit ni kapahimuslan sa mga sindikato sa krimen.
* * *
Si Soliman, tungod tingali kay maoy nasentro sa kontrobersiya ug gihan-okan sa tanang tulisok, maoy labing unang nihubad sa mga pasumbingay: Sila ang nitanyag og tabang sa local government units (LGUs) sa Metro Manila pagtigom sa mga bata ug mga ginikanan ubos sa pinalapdan nga Pantawid Pamilyang Pilipino Program (4Ps).
Way balaud nga nalapas silang Soliman ug kaubanan. Gawas lang kun mobarug ang mga bata ug mga ginikanan nga gipugos sila sa pagda sa Batangas ug gitanggong sa resort nga supak sa ilang kabubut-on. Mahimong malutsan nila ang kontrobersiya. Apan mahimong mas malungtaron ang mahiagoman nga kadaot sa ilang kaligdong.
* * *
Karon naklaro na kinsay labing naigo sa mga wali ug mga mensahe ni Pope Francis pag-awhag nga higugmaon, panggaon ug panalipdan ang mga bata ug ang labing kabos nga katawhan. Nabantang na sab nga wa mailad si Pope Francis sa maniobra paghipos sa mga bata ug mga ginikanan sa kadalanan.
Ang Santo Papa nibiya sa gitakdang kalihokan, nangita sa mga bata ug nagsusi sa ilang kahimtang. Gawas sa kapin sa P4 milyones nga gigasto sa temporaryong pagpapuyo sa mga bata ug mga ginikanan sa Batangas, ambot pila pa ka milyon ka pesos ang naggasto sa gobiyerno paghatag og mas maayong hulagway ngadto ni Pope Francis. Hinaot nga naamgohan na nilang Soliman ug kaubanan nga, labaw sa kauwaw nga nasakpan, di makatabang sa mga kabos ug kabataan ang pagtabon sa kamatuoran.
- Latest
