Wala pa gihapon makat-on ang mga opisyal ug ang mga lumolupyo sa ubang mga barangay tungod kay gipasagdaan ra nila nga magpabilin nga hagip-ot ang agianan paingon sa nahimutangan sa ilang kabalayan.
Resulta, kun adunay moulbo nga sunog sa ilang dapit nga gipuy-an, wala sila’y laing mahimo gawas sa pagdagan nga dili makadala sa ilang kagamitan kay maghuot na man sila sa gamay kaayo nga agianan.
Mao kini ang nahitabo sa kadaghanan sa mga lumolupyo sa usa ka sityo sa Barangay Basak-San Nicolas nga wala makapanghipos sa mga butang sa ilang kabalayan sa sunog niadto'ng Lunes sa hapon.
Ang agianan paingon sa dapit nga nasunogan hagip-ot kaayo nga maglisud gani pagsugat-sugat ang tawo nga maglakaw, labaw na kun ang moagi mag-aswat og kabtangan nga gusto’ng ilikay aron dili masunog.
Ang dul-an sa 100 ka pamilya nga biktima sa sunog wala gayud makapanghakot sa ilang mga butang. Unta ang nahitabo sa Barangay Basak-San Nicolas himuon nga leksyon sa ubang katawhan.
Mentras may higayon pa, angay’ng aksyonan ug gub-on ninyo ang mga illegal structures nga gitukod diha sa agianan ug iya sa mga mapahimuslanon sa higayon.
Ang mga opisyal sa kabarangayan angay’ng molihok na ug ipatuman ang tukma nga lagda sa walay pagkukahadlok nga adunay mangasuko kaninyo ug dili na mobotar sa paglansar ninyo pagbalik sa katungdanan.