Problema sa trapiko wala pa'y sulbad
Daghan na ang mga karsada sa dakbayan sa Sugbo nga gipalapdan aron unta dili na maghuot ang mga sakyanan.
Apan nagpabilin ang problema kay dili diay alang sa pagsulbad sa kahuot sa trapiko ang pagpalapad sa mga karsada, kondili para lang makakuwarta ang panudlanan sa kagamhanan ug sa mga dispatser.
Dili tanang nag-illegal parking sa mga karsada nasapian sa gobiyerno kay usahay ang mga dispatser mao ra’y nakakuwarta niini.
May mga gipalapdang karsada ngadto unta sa pagka “four lanes” gikan sa “two lanes” apan unsaon nga gihimo man nga parkinganan sa mga sakyanan ang matag daplin.
Unya libre kaayo sila adlaw ug gabii, kay wala’y naningil nga CITOM parking aides ug dispatser. Daghan ang nangutana kun unsa may nahimo sa kagamhanan bahin sa pagsulbad sa kahuot sa trapiko matag adlaw?
Alang sa Espada kun may nahimo man ang kagamhanan niini anaa ra tingale sa 10 o 20 porsiyento.
Busa tungod kay matag adlaw nagdugang ang gidaghanon sa mga sakyanan, mura’g wala nay panahon pa nga mobalik ang sama kaniadto nga malinawon ka nga mobiyahe tungod kay hapsay man ang dagan sa trapiko.
Kun problema dinhi sa siyudad ang baha tungod sa kagagmay sa imbornal, aw mas gaan-gaan kini’ng problemaha kay masinati man lang kini kun mag-ulan.
Lahi sa suliran sa trapiko nga matag oras kada adlaw mao kanunay ang masinati sa mga tawo.
Kini tungod kay matag adlaw nag-anam kadaghan ang mga sakyanan ug wala’y plano ang gobiyerno kun unsaon sa pagkontrolar niini.
* * *
- Latest
