Mga ligoy g’yud

Sukad tak-opi ang Inayawan Sanitary Landfill diha sa Barangay Inayawan, dakbayan sa Sugbo, daghan na kaayo’ng mga basura sa matag barangay nga wala maatiman sa paglabay, unya baho na kaayo.

Kini imong makita karon sa mga daplin sa karsada hapit sa matag barangay sa kapatagan ni’ng siyudad.

Ambot kaha sa kabukiran kun ingon ba kaha gihapon niini ang hitsura sa ilang kadalanan.

Apan nagtuo kita nga mas d’yutay og basura ang mga bukirang barangay kay sa kapatagan. Usa sa mga hinungdan niini mao ang pagkagubaon sa trak sa basura sa mga barangay.

Matag piyesa sa sakyanan, sama usab sa lawas sa tawo, nga may katapusan.

Hinuon kini mag-agad ra man sa budget nga igahin sa barangay alang sa maintenance sa ilang sakyanan, diin kun may kuwarta lang ang barangay, aw ngano’ng pasagdan man nga maglubog ang trak sa basura.

Ang pait g’yud mao nga kun ang pagkagusbat sa sakyanan sa barangay naggumikan sa kataspukan sa mga tawo nga nagdala niini, sama sa drayber ug mga katabang sa paghakot sa basura.

May mga trak sa basura nga dili pa g’yud hugasan sa nagdumala hinungdan nga kun maagian ka nga magbarug sa daplin sa karsada, kuyapan ka sa kabaho.

Mao kini nga dali ra’ng maguba ang garbage truck kay matay-an man ang mga piyesa gumikan sa kataspokan sa gitugyanan niini.

Mas maayo nga ang mga tawo nga piyalan niini, mao kadtong maantigo momaneho ug mekaniko pa g’yud ug labaw sa tanan, kugihan moatiman ug molimpyo sa sakyanan sa barangay aron dili dali maguba. (wencelen@yahoo,com)