Nangandam na ang Commission on Elections sa posibleng pagpahigayon na sa Sangguniang Kabataan Elections karong Pebrero 21 ning tuiga.
Karong adlawa opisyal nang magsugod ang election period gawas na lang kun dunay mga kausaban diha sa Kongreso kabahin sa nag ung-ong nga balaudnon nga mag-oktaba niini ug idungan na lang sa synchronized local ug national elections sa sunod tuig.
Lanog kaayo ang panawagan nga repormahon ang SK system tungod kay nahimo na kining breeding grounds sa mga kurakot nga public elected officials.
Bisan unsa pang panghimakak ang himuon sa mga lunlong tigsuporta sa SK, apan dili nila ikalimod nga nagamit ang ilang pundok sa pagpangurakot sa mga hamtong ug sa mga tradisyonal nga politiko sa ilang mga dapit.
Ultimo gani ang simpleng proyekto alang sa kabataan sa barangay adunay mga kickbacks nga nalambigit aron lang kaaprubahan.
Pinaagi sa mga ginagmay nga pagpangurakot makat-on ang kabataan nga mangawat, ug kay nakatilaw ug nakat-on na man kun unsaon pagpangwarta, maengganyo sila pagdagan og pwesto kun maabot na sila sa hustong edad ug diha na magsugod ang pagpangawkaw sa mas dagko nang kwarta sa katawhan.
Kinahanglang repormahon ang sistema sa SK aron dili makakita og buslot nga kalutsan ang mga buaya nga politiko nga gamiton ang kabataan.
Dili hinuon kini garantiya nga dili na g’yud malambigit sa kurapsyon ang SK tungod kay duna man g’yuy mga tawong hanite kaayong molikoliko sa interpretasyon sa balaod aron sila makalusot.
Mag-unsa na lang ang nasud kun ang nakat-unan sa kabataan pulos binuang gikan sa mga nag-una kanila sa duyan?