Daghang salamat sa pagbisita Papa

Kagahapong adlawa mibiya na si Pope Francis balik sa Roma human sa iyang lima ka adlaw nga pagbisita dinhi sa nasud.

Gibilin ni Santo Papa dinhi sa Pilipinas ang mensahe sa Ginoo isip iyang piniyalan dinhi sa kalibotan. Ang mensahe sa Santo Papa sa katawhan ug opisyal sa nasud klaro ug tataw - undanga ang kurapsyon.

Dili ikalimod nga si Pope Francis maoy papa sa katawhan tungod sa gipakita nila’ng paghangop kaniya sa iyang pagbisita dinhi sa nasud ug kini atong makita niini’ng mosunod nga mga numero.

Dos mil ka pari ang mikonselebrar sa iyang kataposang misa sa Luneta ug 1,000 ka sakop sa Choir ang mikanta sa English ug Pilipino nga kanta sa simbahan gamit ang mga lokal nga instrumento.

Mga 200 ka sakop sa orchestra ang miduyog sa choir. Unom ka lokal nga pinulongan ang gigamit nga gilangkoban sa Hiligaynon, Kapampangan, Ilokano, Cebuano, Bisaya ug Bikolano.

Adunay 4,622 ka sakop sa media sa Pilipinas ang gihatagan og pagtugot nga maka-cover sa Santo Papa ug 14 ka Filipino journalist ang gitugotan nga makauban sa eroplano nga gisakyan sa Santo Papa kauban usab ang mga sakop sa international press.

Mga 25 mil ka polis ang gipakatap sa Luneta park nga didto mipahigayon sa iyang kataposang Misa sa Pilipinas ang Santo Papa. Kapin sa 5 mil ka lay minister ang gipatabang sa pagpakalawat.

Kapin sa 30 mil ka metal detectors ang gigamit pag-detect sa mga armas nga gipangtagoan ug 700 mil ka tawo nga anaa sulod sa Quirino  Grand Stand ang gitugotan nga makapaduol sa Santo Papa sa iyang pag- agi.

Wala’y commentators sa Misa tungod kay gusto sa taga Vatican nga gikan gayud  sa baba sa mga nanimba ang tubag sa mga litorhiya. Miabot og 18 minutos ang gigahin alang sa pagpangalawat ug 18 usab ka Wide LED screens ang gimuntar sa Luneta aron makakita ang mga 6 mil ka tawo nga mitambong sa Misa nga tua na sa layo.