Pamolitika sa plitehan

Huwebes pa sa niaging semana nga giaprobahan sa ulohang buhatan sa Land Transportation Franchising and Regulatory Board (LTFRB) ang pag-us-os ngadto sa P7 sa minimum nga plitehan sa public utility jeepneys (PUJs) sa Sugbo ug Central Visayas. Apan nagpaabot ang kadagkoan sa LTFRB og upat ka adlaw una ipahibawo ang hukom nilang LTFRB Chairman Winston Ginez ug kaubanan.

Mao ni labing uwahi sa nagkataas nga kutay sa paglangay-langay sa LTFRB sa paglaslas sa plitehan atubangan sa dako ug paspas nga pagtibugsok sa presyo sa lana. Wa tingali silay tinguha pagduot sa mga pasahero, apan gipalabi lang ang burukrasya. Gipakapinan pa gyod og pamolitika.

* * *

Mahimo baya untang ipahibawo dayong Ginez ang P0.50 nga laslas sa minimum nga plitehan sa PUJs sa Sugbo ug Central Visayas pagkahuman gyod sa tigom sa ilang ulohang buhatan niadtong Enero 8. Apan gitipigan nila ang pahibawo hangtod nga makaabot siya sa Sugbo gahapon, Lunes, atol sa tigom mahitungod sa bus rapid transit (BRT).

Nganong ganahan man si Ginez nga mao gyoy mangunay paghimo sa pahibawo dinhi sa Sugbo? Nahadlok ko nga may kalambigitan ni sa (1) iyang aplikasyon pagka komisyonado sa Commission on Elections (Comelec), (2) panginahanglan pagkuha sa suporta sa mga politiko sa Sugbo ug (3) kasayon pagkuha sa suporta kun magda siya og maayong balita.

* * *

Mahimo sab unta nga iapil ni Ginez ang Sugbo ug ubang bahin sa nasud sa ilang pag-aprobar sa P1 nga us-os sa minimum nga plitehan sa PUJs sa Metro Manila ug kasilinganang mga lalawigan niadtong Disyembre sa niaging tuig. Kay ang gipasikarang petisyon, nga gipasaka ni Kongresista Manny Iway sa Negros Oriental, klarong gitumong alang sa tibuok nasud.

Apan gidaginot gyod ni Ginez ang teknikalidad nga may buwag nga petisyon nga gipasaka si kanhi Cebu City Councilor Jun Pe. Busa kinahanglan pang tukion sa buwag nga public hearing sa rehiyonal nga buhatan sa LTFRB sa Central Visayas.

* * *

May rekomendasyon na si LTFRB 7 Regional Director Reynaldo Elnar pagpatuman og P0.50 nga pasiunang laslas sa plitehan sa wa pa mamakasyon ang taga LTFRB ug ubang buhatan sa gobiyerno alang sa Pasko ug Bag-ong Tuig. Gipalabi nilang Ginez ang bakasyon kay sa pagtuki sa rekomendasyon.

Nibalik nang trabaho sa gobiyerno niadtong Enero 5. Apan gipaabot pa gyod nilang Ginez ug kaubanan ang Enero 8 una dasoni ang nalangay na pag-ayong laslas sa plitehan. Nga nakapatumaw sa dugang teknikalidad: Unsa may mahitabo sa plitehan sa mga rehiyon nga way nipasaka og petisyon? Imando na ba sang Ginez ang buwag nga public hearings? O igo na lang siyang mosuroy paghimo og buwag nga mga pahibawo sa us-os sa plitehan, iyawat madugangan ang mga padrino sa iyang politikanhong ambisyon?

[email protected]