Gibati og kahibulong ang kadaghanan ngano’ng nakapatukod og labing dako nga arena sa tibuok kalibutan ang Iglesia ni Cristo (INC).
Sa AGIO Forum niadto’ng Martes didto sa opisina sa PIA, nangutana si Sinulog Foundation Inc. Executive Director Ricky Ballesteros kun wala bay hinabang ang INC gikan sa ubang grupo sa katawhan, politiko, mga dagko’ng negosyante, o kaha gobiyerno sa nasud ug sa gawas sa nasud sa pagpabarug sa Philippine Arena.
Matang sa pangutana nga dinagko’ng tawo ug puno sa respeto nga inubanan sa mga pagdayeg tungod kay wala man gani makapatukod ang gobiyerno sa hain man’g nasud sa kalibotan, ilabi na sa Pilipinas og sama kadako sa Philippine Arena, ang INC na ba hinuon?
Sa 55 mil ka lingkoranan, 10 mil niini sa ubos nga bahin nga pinintalan og lubos puti, atbang sa 45 mil ka lingkoranan nga pinintalan og green, puti, ug pula, mahimo’ng mawala sa usa ka pamilok ug makita usab sa usa ka pamilok kun gikinahanglan na nga gamiton.
Ang mga pangutana ni Ricky, sama usab sa mga pangutana sa mga contractor nga pulos mga foreigner kinsa nahingangha diha’ng miduol kanila ang INC kay magpatukod sa maong proyekto sa sayo pa.
Yano ra usab kaayo ang atong pagkatubag kang Ricky uban sa pagpasabot nga ang tibuok gasto sa maong proyekto nagagikan sa kinabus nga halad-amot sa mga miyembro sa INC.
Matag usa mohatag gayud og amot panahon sa pagsimba nga walay kota o limit, ug wala usa’y pinugsanay, diin gumikan sa maayo’ng pag-atiman sa nagdumala sa INC, natukod ang Philippine Arena. (wencelen@yahoo.com)