EDITORYAL – Dili angay’ng kaloy-on

Angay’ng tinud-on g’yud sa kadagkoan sa kapolisan ang pagpahamtang og silot niadto’ng mga tawo nga giingon’g nagpabuto og armas atol sa pagsugat sa Bag-ong Tuig.

Daghan ang nabalaka nga ang kadagkoan sa PNP maayo lang sa pagpasiatab nga pasakaan g’yud nila og kaso ang mga hingtungdan nga nakuhaan pa gani og hulagway samtang nagpabuto sa armas apan kun mamingaw-mingaw na, dili na ipursiger ang kaso.

Bisan dinhi sa dakbayan sa Sugbo dunay mga polis kaniadto nga nasakpan usab nga nagpabuto og armas atol sa pagsugat sa Pasko ug Bag-ong Tuig, apan gagmay ra kaayo ang silot nga napahamtang kanila.

Naandan na sa kadagkoan sa kapolisan nga molaban gayud sa ilang mga sakop. Sama ra sa mga polis nga maghikog. Ang report sa homicide sections klaro kaayo nga ang polis nagpakamatay.

Apan lahi ang report sa team sa mga imbestigador nga maoy ipadala sa Camp Crame kay ibutang ra nila nga aksidente ang hitabo aron nga ang pamilya sa mga hingtungdan nga naghikog makadawat og benepisyo gikan sa kagamhanan.

Hagit ngadto sa kapolisan nga tinud-on g’yud ang pagsilot sa mga nakahimo’g salaod nga nakabutang sa peligro sa ubang tawo. Kun sila mga sibilyan, ikiha g’yud.