Unsay solusyon sa trapiko?

Piyesta senyor na sugod ni’ng semanaha. Kun ang pagdagsa sa mga tawo o mga deboto ang hisgutan, magsugod na sa pagpangabot sa Sugbo ang liboan ka tawo gikan sa mga lalawigan sa nasud ug bisan sa uban pa’ng kanasuran.

Ug lahi sa pasko, mas grabe’ng kahuot sa dagan sa trapiko ang labing dako’ng problema nga atubangon.  Apan karon pa lang daan ug sa mga miagi’ng mga buwan, inadlaw-adlaw nga problema na ang giatubang sa mga Sugbuanon kun ang kahuot sa dagan sa trapiko ang tan-awon.

Ang labing dako’ng pangutana, mahatagan pa ba og solusyon ang problema sa trapiko sa Sugbo ug kun aduna man, unsay maayo ug epektibo’ng paagi aron masolusyonan ni’ng tanan.

Kun may angayan nga paminawon sa unsay maayo’ng solusyon sa trapiko, kana wa’y lain kundili ang mga tawo nga anaa sa kadalanan kapin sa tunga sa adlaw aron sa pagpamasada o sa mga motorista nga maoy direkta’ng maigo sa bisan unsa man nga kausaban.

Laing tan-awon mao ang pagpamenos sa gidugayon sa ‘go signal’ sa mga traffic lights. Sa dakbayan sa Mandaue pananglit adunay mga go signal nga mo-abot og kapin tres minutos.

Kun mao ni ang magsige, mawagtangan sa pasensya ang mga motorist nga nagpaabot sa pikas nga da’n aron makadagan.  Ug kun mahitabo nga sila na ang mopadagan, dili kalikayan nga mosingit ug mopugos ang ubang sakyanan nga molusot bisan og “caution” na ang signal.

Kini ang rason nga daghan sa mga motorist ang masangit sa intersection nga maoy hinungdan nga dili na halos maka-irog ang trapiko.

(Adunay mga junction box sa mga dagko’ng eskena apan wala kini hugti sa pagpatuman. Ang drayber dili gayud mopugos pagsulod sa intersection kun dili siya makalusot dayon kay kun maabtan sila sulod sa junction box mahimo sila nga dakpon).

Ang labing maayo’ng solusyon sa trapiko anaa ra g’yud sa disiplina sa mga drayber ug sa riding public. Mag-unsa man ang tanang solusyon nga ihatag aron mogaan ang dagan sa trapiko kun mismo ang mga tawo o mga drayber way disiplina sa unsay angay nga himuon aron makatampo sa solusyon ug dili makadugang sa problema.

Gawas sa pagpalapad sa kadalanan ug pag-ayo sa mga drainage system, anaa sa pagpalapad sa kaalam ug pagpalig-on sa kaikag sa publiko sa pagtabang ang solusyon sa kahuot sa dagan sa trapiko.

(Email: [email protected] or [email protected])