Bag-ong Tuig na pud!

Matag tuig, mangutana ta kun pila na ka Bag-ong Tuig ang milabay sa atong kinabuhi. Ug alang niadto’ng dugay-dugay na ni’ng kalibutana, sama kanako, di na gusto’ng magkapoykapoy pag-ihap.

Kahinumdom ko sa mga batan-on pa kami, nagtungha pa sa elementarya hangtud sa high school, pabuhaton g’yud mig New Year’s resolution sa mga madre namo nga magtutudlo.

Ang among tunghaan, ang Saint Alphonsus Catholic School (SACS), sa Opon, karon Lapu-Lapu City, gidumala sa mga Benedictine Sisters, kasagaran mga German. Estrikto kaayo.

Apan, nagpasalamat kami sa ilang pagka-estrikto, tungod kay na-internalized namo, ang self-discipline, ug naumol kami nga mga tiunay nga Kristohanon ug maayo’ng lungsoranon.

So, matag bag-ong tuig, maglista mi sa mga butang nga angay namo’ng buhaton ug sa angay likayan. Unya, maningkamot intawon mi pagtuman sa mga resolution nga among gilista.

Of course, kay tawo ra man ta, mo-backslide g’yud, ug mahibalik sa daan ug dautang mga buhat. Apan, ang maong exercise, nakahatag kanamo’g higayon pagpamalandong ug paghimo’ng accounting sa among mga binuhatan ug pag-resolve sa angay ug husto nga buhaton.

Karon, unsa man? Kun atong gipadayon ang paghimo’g mga New Year’s resolution, unya, paningkamotan pagtuman ang maong mga resolution, dili unta muabot og P10 bilyones ang nahanaw gikan sa atong panudlanan?

Kun sa matag tuig maghimo kita’g New Year’s resolution, unya, atong tumanon, kaminosan unta ang smuggling ug tax evasion. Kun matag-New Year, maghimo kita’g pagbag-o sa atong kaugalingon, limpiyo na unta ang atong mga election, ug tiunay na gayud nga mga alagad sa lungsod ang atong ma-elected.

Numero uno natong suliran ang corruption. Nga kun sa nangagi’ng mga Bag-ong Tuig, nag-resolve kita nga dili na mangawat sa salapi sa lungsod, siyaro, tapus sa duha, lima o napulo ka tuig, di g’yud nato mapitol ang corruption. Ato kuno’ng sugdan karong tuiga ang hugot nga pag-resolve nga dili na ta mangawat ... aron masumpo sa hingpit ang corruption. Siyaro, after a year or two, di g’yud ta mabut-an!

Siyaro, after so many New Year’s resolutions, mga kawatan ug mga tikasan lang gihapon ta.

Kun mao kini ang mahitabo kanato, mga kawatan ug mga tikasan lang gihapon ta, sulod sa tuig 2015, di ta makapaabot og tingusbawan sa mosunod nga katuigan. Ug lagmit, everything will get worse after the 2016 elections.

Busa, atong hatagan og tukma’ng kahulogan ang Bag-ong Tuig, otherwise, kun dili kita makabag-o sa atong kinabuhi, walay kapuslanan ang Bag-ong Tuig. Ang mga printing press ra ang mabulahan pag-imprinta sa mga bag-ong kalendaryo.