Ibalik tawon ang gahin

Nahimo’ng emosyonal ang presidente sa Barangay Councilors League of the Philippines (BCLP)-Cebu City Chapter nga si Atty. Raymund Alvin Garcia tungod sa paglaslas sa konseho sa dakbayan sa Sugbo sa P2 milyones nga gahin para sa liga.

Sulod sa taas na nga katuigan, ang liga sa mga konsehal sa kabarangayan sa dakbayan gigahinan sa dakbayan sa Sugbo og tulo ka milyon alang sa ilang mga programa ug proyekto.

Apan sa tuig 2015, ang giaprobahan P1 ka milyon na lang ang gigahin kanila sa konseho sa dakbayan. Kun unsa man ang kasagmuyo sa presidente sa BCLP, mao usab kini ang gibati sa mga konsehal.

Wa ko’y laing nakita nga rason ngano’ng gikibhangan sa konseho nga dominado sa mga sakop sa BOPK ang gahin sa BCLP - politika.

Mao kini ang wala nako masabti. Sa pagdala ni Atty. Garcia sa BCLP wa g’yud mosantop sa huna-huna niini ug sa ubang mga opisyal ang pagpamolitika sa kahugpongan tungod kay maoy gipatigbabaw niini ang pag-alagad sa iyang mga sakop, ma yellow green man o ma yellow blue.

Ang gipaabot sa mga opisyal sa BCLP mao ang pag-umento sa iyang gahin aron mapatas-an ug mapalapdan pa ang iyang pagpangalagad ug mga programa ug dili ang paglaslas sa iyang gahin.

Ang gipaabot sa BCLP mao ang pag-ila sa konseho sa dakbayan sa iyang mga nahimo ug dili ang paglutos sa iyang organisasyon.

Ang gipaabot sa BCLP mao ang kahiusahan sa tanang opisyal sa dakbayan ug kabarangayan sa ngalan sa pagpangalagad ug dili ang pagbahin-bahin ug pagbuak sa gitinguhang kahiusahan.

Mao kini ang mga rason sa akong pag-apelar sa mga sakop sa konseho sa dakbayan sa Sugbo sa pag- usab sa ilang baruganan ug sa pagbalik sa gahin nga iya na sa BCLP sulod sa milabay’ng katuigan.