Ngano’ng hadlok man kaayo si Senador Serge Osmeña nga mahatagan og emergency powers si Pres. Noynoy Aquino aron malikayan ang power crisis sa summer sa 2015?
Ang Ubos Balay Balaoranan mipasar na og resolusyon paghatag og emergency powers kang Aquino. Apan ang Senador pabiling nagmagahi sa pagpasar og kaugalingong resolusyon.
Aron moepekto ang emergency powers sa presidente, nagkinahanglan nga ang duha ka Kamara maoy mopasar og resolusyon tungod kay ubos sa atong Konstitusyon, bicameral (duha ka Kamara) man ang atong Kongreso.
Nagduda ko nga hadlok si Serge nga malili sa gobiyerno ang dagko’ng mga players sa power industry kun ang presidente mahatagan og emergency powers. Ang mga Pilipino daan na nga nakabantay ni Serge nga kanunay’ng mangabugar sa duha ka dagko’ng business family nga pulos nanag-iya og kinadak-ang power distribution companies sa Manila, Cebu ug Davao.
Kini’ng mga dagko’ng power players nahadlok nga pinaagi sa emergency powers, malili sa administrasyon’g Aquino ang ilang mga kompaniya ug mahibaw-an sa katawhan kun giunsa nila pagpaburot ang ilang ginansiya pinaagi sa pag-abuso sa mga konsumedor pagpaningil og taas nga balor kada kilowatt hour nga konsumo sa kuryente.
Ang gobiyerno nagduda usab nga maniobra ug mugna-mugna lang sa mga kompaniya sa kuryente ang power crisis aron gamiton nga rason pagpamahal sa ilang paningil kada kilowatt- hour.
Hangtud magpabiling gahi si Serge sa iyang baruganan, nahadlok ang gobiyerno nga mahitabo ang halapad nga brownout sa summer sa 2015.
Ang emergency power epektibo ra man unta gikan sa Marso hangtod sa Hulyo, unsa may angay kahadlokan ni Serge?
Si Serge makalibog. Matud niya ang power crisis problema sa private sector nga dili angayan apilan sa gobiyerno. Apan matud niya problema kini nga na mis-manage sa gobiyerno. Pastilan!
Iyang kanunay girason ang EPIRA law of 2001 nga matud niya maoy babag sa emergency powers. Kay kun mapasar ang emergency powers, matugotan pagtukod ang dugang power plants – butang nga gidili sa EPIRA.
Ang principal author niining EPIRA mao si Serge, tinabangan sa iyang ig-agaw nga si kanhi senador karon Toledo City Mayor Sonny Osmeña. Silang duha pareho’ng nakapangasawa og sakop sa pamilyang tag-iya og power firm.
Human sila nagmalampuson pagpusoy sa mga kunsomedor pinaagi sa pagpasar og balaod nga pabor kaayo sa ilang gilabanan nga mga negosyante’g kuryente, si Serge nagpadayon pa gihapon sa pagpangabugar sa mga kompaniya’ng nahatagan na og pabor sa balaod nga iyang gipangamahanan.
Busa kun dunay angay pakasad-on ngano’ng ingon kamahal ang atong kuryente, tulisoka ninyo si Serge ug si Sonny. Pulos sila mga Sugboanon, ug mga Osmeña pa g’yud.