Paskohanong Awit

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang mga awit ug dayandayan sa Pasko

Daghan ang nag-ingon nga kaniadto sa nangaging katuigan  ato na nga mabati  ang  mga Paskohanong awit sa bulan pa sa Septiyembre nga  pagaawiton sa mga mananaygon  o ipatugtog sa kahanginan sa nagkadaiyang sibyaanan sa radyo.

Nunot sa mabati nga mga Paskohanong  awit maoy mamatikdan sa katawhan kaniadto ang pagsugod na usab sa pagpamutang sa kabalayan og mga Paskohanong dayandayan ug bisan gani  sa kadalanan ipahimutang na kini sa mga lokal nga opisyal isip sa pagtimaan nga nagkaduol na ang pagsaulog sa Pasko.

Dugang pa nila nga sa mosunod pa nga mga bulan sa Oktubre ug Nobiyembre mabati ang kalanrakas sa kadalanan nga ang tawo nga maglakaw maigpot sa kahadlok sa kalit lang nga pagboto sa rebentador nga bisan kuyaw  nakadugang kini sa kadasig sa adlaw sa kasaulogan sa Pasko sanglit matawo na man si Ginoong Hesukristo nga manluluwas sa katawhan sa nalumos sa kasal-anan.

Karong panahona maoy  namatikdan ang mga batan-on nga bulingit ang pamayhon nga  manaygon sa kadalanan o mga sakyanang pasaheroan nga dili masabot ang ilang gikanta daw makatumaw pa sa katahap nga naggumon sila sa paggamit sa ilegal nga drugas.

Ang mga pasahero sa PUJ nga masakyan sa maong grupo sa mga batan-ong mananaygon daw bation og kahadlok nga magsud-ong sa ilang pamayhon nga mokanta lang og putol dayong panguhit ug pangablit sa pasahero sa pagpangayo og sinsiyo.