EDITORYAL – Nagpaila sa kahakog

Hakog ra kaayo ang mga drayber sa mga PUJ kun moinsister sila nga dili pakubsan ang pletehan bisan og ubos na kaayo ang presyo sa gasolina, labaw na ang krudo nga maoy sagad nila gigamit.

Usa ka lider sa gamay’ng hugpong sa mga drayber dinhi sa Sugbo miingon nga ang gusto unta nila “umento” ug dili “rollback” sa pletehan sa mga PUJ. Ang mao nga pamahayag nagpaila lang sa ilang kahakog.

Bisan gani og P7.50 ang minimum nga pletehan sa mga pasahero base sa gilatid sa Land Transportation Franchising and Regulatory Board (LTFRB) apan hapit tanan kanila mangolekta’g P8.

Ang ilang rason nga walay sensiyo nga 50 sentimos nga ikasukli. Apan bisan pa og tunolan nimo’g P20 unya duha kamo nga mosakay, suklian ka lang gihapon og P4 nga ‘tag P8 ra gihapon.

Ang gasolina kaniadto miabot gayud og tag P53 ang litro ug kapin sa P40 ang krudo. Kun ang mga PUJ drivers ang magpatubil, may discount pa sila nga piso.

Karon nga ang presyo P39 na lang ang litro sa gasolina ug P30 ang krudo, mao gihapon ang ilang kolektahon. Klaro kini nga nagpaila sa ilang kahakog.