“White Code” maoy kodigo nga gisagop sa Department of Health (DOH) karong Pasko ug Bag-ong Tuig.
Gikan karong adlawa, Disyembre 21, ngadto sa Enero 5, 2015, sagupon ang code white sa 50 ka hospital nga ubos sa pag-atiman sa DOH-7 aron pag-atiman sa madisgrasya sa pabuto.
Limpyo ug puti kaayo ang mga bed cover ug habol sa matag hospital.
Hait na usab ang mga gunting, labaha, plamingko ug talinis kaayo ang mga dagom nga giandam sa tagdumala sa mga tambalanan.
Kini maoy hingpit nga katumanan sa white code nga ipatuman sa DOH niini’ng Pasko ug sa New Year.
Limpyo ug humot kaayo ang mga bed cover nga mamansahan lang unya sa mga dugo gikan sa mga samaron, sama sa mapungkol, mabakol, mabulhog, ug mainutil sa pabuto.
Gibaid usab pag-ayo ang mga gabas aron igabas sa mga bukog sa mga kuyamoy nga magkawil-kawil na lang kay nabuthan.
Bisan ang mga dagom, gi-sterilize na’ng daan aron itahi sa mga ngabil nga mabungi ug uban pa’ng mabuslot nga bahin sa lawas gumikan sa pabuto.
Kini’ng tanan giandam na sa DOH tungod kay gipaabot sa maong ahensya nga daghan ang madisgrasya sa pabuto karong Pasko ug sa pagsugat sa Bag-ong Tuig.
Nasabtan man gud sa DOH ang kagahi og ulo sa mga Filipino, busa duyogan na lang niini ang kinaiya sa mga tawo nga hilig kaayo og pabuto sa Pasko ug New Year, busa .. Merry Christmas sa tanan!.
* * *