Insik nga uyab ipasusi sa PWC

Maayong lihokon sa Provincial Women’s Commission sa lalawigan sa Sugbo ang pagsusi sa kaso sa usa ka minor de edad nga kanunay’ng mabalita tungod sa giingong pagpanghilabot ug ning katapusan mao ang pagbukong sa taksi ug pagtabla sa bayranan sa tulo ka adlaw nga pagpuyo sa usa ka resort.

Ang batan-ong maanyag nga gikagubtan sa media tungod sa ka-tisay niini, maayo mo-iningles ug giingong anak og adunahang pamilya gikataho nga aduna diay uyab nga negosyanteng Insik dinhi sa Sugbo mao nga magkanunayan kini dinhi sa Sugbo. Ang nakapait, ang uyab niyang Insik usa ka dakong minyo.

Busa maayong ilhon sa PWC ang Insik aron ikiha kini. Tataw man nga kalapasan sa Anti-Child Abuse Law ang iyang gihimong pag-among-among sa kadungganan sa bata. Kini tungod sa nadiskobrehan sa PWC nga gipanguluhan ni Bise Gob. Agnes Magpale nga 16-anyos pa diay kini.

Dili mabutang sa balita sa media nga nanabla sa bayranan sa resort ang maanyag nga batan-on kun gibayran pa kini sa Insik nga maoy gikakuyog niini sa pag-check-in. Matud pa nga nag-away ang duha sulod sa resort hinungdan nga milakaw ang Insik ug wala na balika ang batan-on. Kay walay kuwarta ang batan-on, wala kini makabayad sa resort.

Dili mahitabo ang ingon nga klaseng kaulawan kun wala pa kining Insik nga nag-abuso sa iyang kabatan-on.

* * *

Pananglit mo-intra sa linya sa mga presidentiable si Senador Grace Poe alang sa 2016 nga eleksiyon, dili ba kaha mo-alma ang mga human rights groups ug ang mga biktima sa Martial Law?

Mao kini pangutana nga mitumaw karon human makakuha og taas-taas nga rating sa Nobiyembre nga survey si Poe. Nganong ingon man usab niini ang pangutana?

Siyempre, kusog pa sa manatad ang balita nga kini diay si Grace Poe anak sa gawas ni anhing diktador Ferdinand Marcos sa artistang si Rosemarie Sonora, apan gi-adopt sa igsuon ni Rosemarie nga si Susan  Roces ug sa bana niining si Fernando Poe Jr.

Dinhi nato makit-an ang kahugot sa ideolohiya sa mga biktima sa tawhanong katungod sa rehimen  ni Marcos. Kun mo-alsa sila sa kandidatura ni Grace Poe, sa ato pa, buhi pa ang ilang pakigbisog ug pagbabag nga adunay Marcos nga modumala pagbalik sa Pilipinas.

*  * *

Karon nga mitibugsok sa survey si Bise Pres. Jejomar Binay, ang media na ang iyang gibasol. Matud niya nga nabayran ang media aron pagdaot kaniya.

Nayabag na!

Mga isyung giatubang niya – Makati parking building, asyenda ug mga condo – wala gyud niya tubaga. Unya, ang media iyang pasanginlan.