EDITORYAL – Criminal justice system

Ang katawhan angay gayud nga moabag sa kapolisan aron madakpan ang mga badlongon sa katilingban nga anaa ra mag-estar sa ilang palibot.

Mao kini ang tumong ni Senior Superintendent Conrad Capa, ang bag-ong hepe sa kapolisan sa dakbayan sa Sugbo, nga mimando sa mga hepe sa lainlaing police stations nga ibutang sa social media ang panagway sa mga wanted persons ug mga tulisan.

Usa kini sa lakang ni Capa aron nga madakpan sa labing dali nga panahon ang mga pinangita sa balaud, ilabi na kini’ng mga tawo nga responsable sa mga pagpanulis sa lainlaing mga balay-patigayon dinhi sa Metro Cebu.

Ang mga tulisan nga sagad mobiktima sa mga money remittance outlet ug susama nga mga balay-patigayon dinhi sa dakbayan wala gayud madakpi sa kapolisan mao nga si Capa nakahuna-huna nga ang dagway sa mga suspetsado’ng tulisan ibutang sa social media.

Ang kuyaw lang niini kun mosipyat ug masayop ang kapolisan nga ang mabutang nga suspetsado’ng tulisan mao ang mga inosente’ng sibilyan. Hinuon, ang mga tawo kang kansang hulagway mabutang sa social media, makahimo pag-adto sa kadagkoan sa kapolisan ug itataw ang ilang kainosente kun limpyo ang ilang pagkatawo.

Ang katawhan angay gayud nga motabang sa kapolisan pagsumpo sa mga dautang elemento kay isip kabahin sa kumunidad, maisip kini nga kabahin sa gitawag og Five Pillars of Criminal Justice System.

Kun adunay usa ka haligi sa Criminal Justice System nga huyang, ang kampanya batok sa mga dautang elemento dili malampuson.