Andam na mentras layo pa

CEBU, Philippines – Ang Eastern Visayas gihapon maoy giigo sa bagyo sugod niadtong Sabado sa buntag. Maayo na lang kay ang mga tawo nangandam na bisan layo pa kaayo ang bagyo’ng Ruby.

Umaabot pa si Ruby, ang mga tawo abtik na kaayo’ng nag-monitor sa dagan niya gikan sa dagat Pasipiko. Timailhan kini nga nakakat-on na kita og leksiyon sa bagyo’ng Yolanda.

Magpasalamat kita nga gawas sa PAGASA, aduna nay mga typhoon monitoring center ang mga silingan nato’ng kanasuran sa Asya. Paspas usab muhatag og projection ang nasud sa Amerika ug Britanya. Ang gusto lang nako’ng mahibaw-an kun wala na bay away gikan sa mga politiko. Hinaut mawala na sa batasan nato’ng mga Pilipino nga inay maghiusa taliwala sa katalagman nga muigo, magtinulisokay, mag-awayay, ug magnilabayay hinuon og lapok. Ang Tacloban giigo gihapon ni Ruby, apan wala na magmagahi og ulo ang mga residente, sayo kaayo sila’ng namakwit palayo sa baybayon. Dinhi sa siyudad sa Sugbo, ang mga coastal barangays abtik nga mipabakwit sa mga residente nga anaa manimuyo duol sa sapa.

Ang makaluluoy mao ang kaigsuonan nato’ng mga Waray didto sa Eastern Samar tungod kay didto g’yud motugdon si Ruby.

Hinuon, pipila pa lang ka adlaw sa diha’ng nabatyagan na ang bagyo nga mopaingon sa Philippine area of responsibility, ang nasyonal nga kagamhanan pinaagi sa Department of Interior and Local Government nakig-coordinate naman sa mga lokal nga opisyal aron sayo nga mapalayo gikan sa mga lugar nga kuyaw sa storm surge ug landslide.

Mismo si DILG Sec. Mar Roxas personal nga miinspeksiyon sa mga barangay sa Borongan, Eastern Samar aron kumbinsihon ang mga tawo sa sayo’ng pagbakwit. Gipangunayan ni Roxas, uban ni Presidential Spokesman Edwin Lacierda ug Borongan Mayor Fe Abudan sa pagsuperbisar sa mga evacuation center sa Borongan.

Mao kini nakanindot kun dili kontra sa politika ang usa ka mayor tungod kay sayon ra kaayo ang koordinasyon tali ni Roxas ug Lacierda. Kun nahitabo pa tingale’ng si Tacloban Mayor Alfred Romualdez pa, malukop tingale kini og pangaway tungod kay gihugonhugon man nga mag-senador si Romualdez ubos sa United Nationalist Alliance ni Bise Pres. Jejomar Binay, nga dakong kontra ni Roxas. Mao usab kini mahibudngan nako sa mga hinawayon sa Facebook. Matag higayon nga adunay himuon si Roxas isip kalihim sa DILG, grabe kaayo silang makasaway apan ang mga pagsaway hilabihan kahaw-ang.

Kini hinuong mga tawhana nga manghinaway, mao usab ang mga modayeg-dayeg ni Binay nga utro’ng sawayonon tungod sa iyang mga isyu gikan sa kurapsiyon sa mayor pa siya sa Makati, pagpanag-iya og 350-ektaryang hacienda nga adunay de aircon nga baboyan, ug mga condo nga wala sa iyang SALN.