Dear Atty. Divine,
Duna ko’y pangutana may labot sa akong apelyido. Ang akong gidala karon nga apelyido sa akong mama kay illegitimate child man ko. Apan karong bag-o, akong na-meet ang akong tinuod nga amahan ug iyang giangkon nga iya ko’ng anak. Matud sa akong biological father nga gusto niya nga ang iyang apelyido na ang akong gamiton. Wa ‘sab mosupak ang akong inahan niini. Unsa may akong buhaton aron mausab ang akong apelyido ngadto na sa apelyido sa akong amahan? Moagi pa ba mi og korte kun akong ipausab ang akong apelyido? - Leslie
* * *
Dear Leslie,
Ang usa ka illegitimate child kon anak sa gawas sa kaminyuon mahimo nga mogamit sa apelyido sa amahan kun siya gi-acknowledge niini o giangkon siya nga iyang anak.Kun ang illegitimate nga bata nagamit sa apelyido sa inahan mahimo kini niya’ng ipausab sa apelyido sa iyang amahan. Ang unang buhaton niini mao ang pag-execute sa amahan og Affidavit of Paternity or Acknowledgment ug unya iyang ilakip sa maong dokumento nga iyang gitugutan ang iyang anak sa paggamit sa iyang apelyido ug dayon iya kini nga i-submit sa Local Civil Registrar diin siya marehistro. Ang maong proseso dili na kinahanglan nga moagi pa sa korte kondili adto ra kini buhaton sa Local Civil Registrar. Ang maayo nimong buhaton karon mao ang pagbisita sa Civil Registrar diin ka marehistro ug pangayo og listahan sa mga dokumento nga angayan nimong isumiter aron mapausab ang imong apelyido. – Atty. Divine
* * *
Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa flores_ divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.