Aron madawat sa trabaho

Daghan karon ang naninguha sa pagpangaplay aron makatrabaho. Apan daghan pud ang nadismaya, kay napakyas nga nahilis na lang ang tikod sa sapatos, wala gyuy konsuylo nga makakaplag og trabaho.  Gani aron lang dawaton, mohanyag pa nga bisa’g walay suweldo basta pakan-on lang.

Malagmit sa pagpangaplay og trabaho, wala kaayuy kahibalo unsay paagi para maseguro nga piho gyud nga dawaton. Sagad gud, ang anaa sa ilang hunahuna mao ang pakig-indigay sa abilidad, nga may ikapanghambog nga katakos ug mga ngilngig nga records o mga medalya sa iyang pag-eskuyla.

Mahibulong ka lang nga wala ra sa imong kumingking ug lisud ka pa gyud hibintahaan, apan silay gisuwerte nga nadawat sa trabaho. Nga sa paniid mo ikaw gyud unta ang mas kwalipikado sa maong posisyon nga giaplayan nimo.

Karon gud panahona, tungod sa kadaghang kwalipikadong nangaplay, pahimuslan nila nga pilion ang mas haom sa trabaho. Sa interbyu pa lang didto kapahimug-atan nga kakuhaan og base kun kinsa ka sa imong kinaiya o kapabilidad nga mapuslan ka ug dili kun unsay gibug-aton sa imong kapasidad nga ikaw motrabaho.

Ang maayong patratar sa trabaho pinaagi sa maayong serbisyo, pakig-alayon o maayong relasyon sa panarbaho ug sa tagdumala. Sa estilo nimo sa tinubagan sa interbyu, makaila na sila kanimo. Di bale nga wa kay kasinatian sa trabaho kay tudloan o giyahan ka man sa buot nila ipabuhat.

Ang importante, ipabati mo sa ila ang mensahe nga ikaw hingpit nga matinud-anon nga mapainubsanon ug epektibo nga ikaw kapuslan gyud nila. Sud-onga ang mata sa nag-interbyu aron makita mo nga ikaw masaligan.