Pag-accuse sa accuser

Kun akusahan ka’g something nga makadaut kanimo, ang hustong tubag, dili ang pagpanghimakak sa mga akusasyon, kay sayon ra kaayo ning buhaton, kondili ang pag-atubang niini uban sa mga ebidensiya pagmatuod nga tumotumo lang ang mga akusasyon ug namolitika lang ang mga mipasangil.

Mao ni ang gibuhat ni Senate President Franklin Drilon. First day sa hearing, miatubang dayon siya sa nag-imbestigar ug sa nag-akusar kaniya. Wala siya magbalik-balik pag-anhi sa Sugbo. Ambot kun magpadayon ba ang pag-imbestigar kaniya.

Laing suway paglusot sa mga giakusar mao ang pagsumbalik og accuse sa mga accuser. Kini aron pag-discredit sa mga accuser, aron dili tuohan.

Mahimo nga ang mga accuser mas labaw pang makasasala kay sa gi-accused, apan, dili kini makapapas kun unsa man nga kasal-anan ang gibasehan sa akusasyon. Kinahanglang imo gihapon ning tubagon, pag-clear sa imong ngalan.

Mahimo nga masayop ko ning ubos ko’ng pangagpas, apan, accusing the accuser won’t do you any good, it won’t clear your name.

* **

Niay maayo alang sa dili makabiya sa alak nga makahubog. Duna ko’y pipila ka amigo nga mahilantan kun dili makainom kada adlaw. Kun mahubog mas maayo alang kanila.

Per se, di man dautan ang alak. In fact, kun moderate drinking lang, makaayo man kini sa atong lawas, bisa’g kada adlaw pa.

Usa ka pagtuon gihimo sa 52 ka nasud nasuta nga low-to-moderate alcohol consumption can reduce the risk of heart attack. Sa ato pa, kun ginagmay lang, makaayo sa atong lawas, makapamenos sa kahigayonan sa pag-atake sa kasingkasing.

Ambot ngano’ng ganahan g’yud maghubog ang tawo. Di man makontento og tagsa o tagurha ra ka botelya sa beer matag session. Unya, inigkahubog, mangaway dayon, ang uban mangulata sa asawa. Pastilan.

Mas daghan kaayo ang nangamatay gumikan sa heart attack nga gi-link ngadto sa subra’ng pag-inom og makahubog. Sa America, matud pa 11 mil ka Amerikanhon ang mamatay matag tuig gumikan sa heart attack.

Busa, kun moinom man, ginagmay lang. Sama sa panigarilyo, nagkinahanglan kini’g utmost discipline ug will power nga lig-on kaayo. Will power nga di mosugot maulipon sa alak ug sigarilyo.