Duna pay paglaom nga bisitahon ni Pope Francis ang Sugbo bisan wala maapil ang probinsya sa mga bisitahon niini karong Enero 2015.
Kini tungod kay daan nang naila ang Santo Papa nga mokalit og liko sa direksyon nga wala sa plano o kadtong wa maapil sa preparasyon.
Samtang labad kini sa ulo sa iyang security details, apan daghan ang nahimuot niini nga kinaiya.
Sa modernong panahon ug sa hulga sa kinabuhi ngadto sa lider sa binilyon ka Romano Katoliko sa kalibotan, kulbahinam ang maong kinaiya.
Pirmeng may paabuton ang katawhan og unsa na say sunod nga buhaton sa Santo Papa samtang kini naghimo sa iyang opisyal nga trabaho.
Basin pa diay og masulod sa huna-huna ni Pope Francis nga ang Sugbo mao ang labing unang dapit sa Asya nga gitarokan sa Kristiyanismo.
Posibleng naapil g'yud sa iyang plano ang paglili kung unsay dagway sa personal sa sikat nga landmark sa Sugbo, ang Magellan's Cross.
Mao kini ang unang Krus nga giugbok dinhi sa Asya, timaan nga ang Kristiyanismo naabot na sa mga isla niini.
Busa kinahanglang dili magmug-ot ang mga taga Cebu ug mag-ampo nga luwas nga makaabot sa Pilipinas ang Santo Papa ug modalikyat og lili dinhi sa Sugbo human sa iyang pagduaw sa mga biktima sa bagyong Yolanda sa Tacloban City .
Wa nay kwenta ang kahasol unya kung moanhi si Pope Francis tungod sa kabalaanon niini ug kadako sa dungog sa mga Cebuano nga gituyoan g'yud kini pagduaw bisan wala sa plano.