Legal ba ang kaminyuon kun adto magpakasal sa Hong Kong

Dear Atty. Divine,

Nagplano mi ug ang akong boyfriend nga mobakasyon sa Hong Kong karong Disyembre ug adto na lang sab kami magpakasal. Kami’ng duha sa akong boyfriend husto na sa edad ug wala na ‘sab mi mga ginikanan. Ang ako lang pangutana attorney kun legal ba dinhi sa Pilipinas ang among kasal bisan kun didto kini gipahigayon sa Hong Kong? Daghang salamat sa imo’ng pagtubag sa akong pangutana. -Liza

Dear Liza,

Bisan kinsa nga Pilipino mahimo’ng magpakasal sa gawas sa nasud ug ang maong kasal legal usab dinhi sa Pilipinas bisan pa kun didto kini gipahigayon sa Hong Kong o sa ubang nasud basta wala lang kini makasupak sa atong balaod. Apan kun ang maong kaminyuon nga gipahigayon abroad usa diay ka bigamous marriage kay minyo na daan ang usa kanila or incest marriage o ba kaha nakalapas sa public policy ang maong kaminyuon base sa atong Family Code, then mahimo na kini nga dili balido ang maong kaminyuon dinhi sa Pilipinas gumikan sa maong kalapasan. Ang inyong buhaton kun adto mo magpakasal sa Hong Kong, muadto lang mo sa Consular Office sa Pilipinas didto sa Hong Kong o sa Philippine Embassy sa nasud diin mo magminyo aron kamo makasal. Mas maayo ‘sab nga mangutana mo daan kun unsay dad-on nga dokumento sa dili pa kamo magpakasal sa maong nasud. - Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.