Ingko Pedong

Karong adlawa na ang paghatod ngadto sa iyang katapusang pahulayan  sa patay’ng lawas ni kanhi mayor Alfredo Mendoza  Ouano nga nailhan sa mga Madauehanon  ug sa mga suod niyang higala nga Ingko Pedong.

Nunot  sa maong adlaw sa iyang lubong maoy gipaabot ang pag-ambahan sa daghang  tawo nga mokuyog sa paghatod sa iyang haya ngadto sa pribadong sam-ang sa Barangay Guizo sa Dakbayan sa Mandaue.

Gikan sa iyang panimalay sa Barangay Opao  ang iyang patay’ng lawas dad-on pa sa National Shrine of Saint Joseph sa Barangay Centro apan sa dili pa kini isulod sa maong simbahan giingong ihunong lang ang iyang haya sa makadiyot sa atubangan sa city hall.

Matud pa nga sukwahi kini sa  naandan nga  ang mamatay nga kanhi opisyal sa usa ka lugar sagad  maoy pagahimoon ang paggahin og pipila ka mga gabii sa pagpahiluna sa iyang haya sa balay lungsod nga iyang kanhi gialagaran.

Dugang pa nila nga ang hingpit nga pagtunod na sa  haya ni kanhi mayor  Ouano hingpit na gayud nga dili na siya makita sa katawhan nga kanhi iyang gialagaran.

Hinuon adunay nag-ingon nga hingpit man tuod nga mawala ug dili na makita sa katawhan si Ingko Pedong  apan magpabilin siyang buhi sa ilang  panumdoman.

Gitataw nila nga ang iyang pagpangalagad sa mga Mandauehanon nga nagsugod pa sa tuig 1956 isip konsehal sa makadaghang higayon, nahimong  bise mayor sa tulo ka termino ug tulo usab ka termino nga mayor maisip na kining kabahin sa kasaysayan sa dakbayan.

Nunot niini adunay nag-ingon nga ang katumanan sa kaugmaran sa reclamation area nga gitukoran karon sa daghang patigayon nga nakahatag og dugang buhis ug  kahigayonan sa panarbaho  maisip usab kini nga bililhong bahandi nga iyang gibilin sa mga Mandauehanon ning adlaw sa iyang pagpanaw ngadto sa laing kalibutan.

Ang hustong timbang

Importante kaayo nga atong mahinumdoman, nga ang hustong timbang aduna kini katumbas nga tukmang gitas-on sa babaye o lalake man. Gikuhaan og base niini ang carta sa mga statistica nga gihimo sa mga kompaniya sa insurance. Nakita nga ang kahimsog sa panglawas, may kalabtanan ang magkatukmang relasyon sa timbang ug sa gitas-on sa atong pagkatawo.

Hinoon managlahi ang epekto niini sa indibiduwal nga gidak-on sa kaha o gilapdon sa kuwadro sa lawas nato. Apan sagad motakdo gyud ang hustong timbang niini ngadto sa iyang gitas-on. Unya, unsa may buhaton nato? Ayaw panaghap sa pagbanabana lang- iseguro gayud mga mamonitor mo kini, kay may daku kining kalabtanan sa kahimsog sa atong panglawas.

Masubra o makulang man ang timbang mo, pulos kini adunay dili maayong tilimad-on sa panglawas. Mahimong dili kini dayon nato mabatyagan, apan kundi maatiman, mokalit lang unya kining maghatag kanato’g kahasol sa daghang pamation sa lawas. Mas maayo  nga buhaton mo na ang pagpanagang nga dili mataligam-an ang kaayohan alang sa atong pagmintinar sa kahimsog.

Angay masayran nga ang babaye, natural lamang nga daling motambok ang lawas niini, busa mas mabinantayon gayud sa pag-atiman niini. Ayaw himoang problema ang pagpayagpis sa kadaut sa lawas, kay di ka man  sama sa pasyonista o artista, nga obsesyon na nila ang pagpagamay pag-ayo. Bisan pa man kini ikadaut na sa ilang lawas - bahala na’g magkasakit. Dili ba? Busa maoy ipukos ang kaugalingon nga mabatonan kanunay ang hustong timbang aron sa pagseguro nga anaa kita sa maayong panglawas.