EDITORYAL - Leksyon sa mga polis

Dili na g’yud angay’ng mokompiyansa ang kapolisan kun mangronda sila og mga balay nga iya sa mga drug pushers aron nga dili masoble nga napatyan sila og duha ka kauban didto sa lungsod sa Moalboal. Sa laktod nga pagkasulti, kompiyansa ra g’yud kaayo sila si PO3 Favio Fernandez ug PO1 Alrasid Jimlani nga wala magbantay nga adunay mga tawo nga dili kasaligan nga makaduol kanila.

Apan sa gihapon, angay’ng yukboan sa katawhan ang duha ka napatay nga polis tungod kay sila namatay atol sa pagtuman sa ilang katungdanan. Ang tukma nga lagda sa police operations mao nga dili angay nga magpaduol og mga walay labot.

Ang mga tawo nga walay labot mahimo’ng makig-estorya sa mga polis nga nangronda aron nga sila malipat ug makahigayon pag-atake ang ilang mga kontra. Sunda ninyo ang mga sakop sa Presidential Security Group (PSG) nga dili g’yud sila motubay pakig-estorya samtang anaa sa trabaho.

Ang mga tigbaligya og shabu armado na karon og dili basta-basta nga armas nga ikasukol nila kun sila maapekihan. Mao man gani kini ang rason nga adunay ubang ahensiya nga ang mga sakop miaksyon na og kurog kanila ug wala g’yuy gihimo nga pagpangronda sa mga druglords.

Apan ang publiko nagpaabot nga himoan na og lakang sa kagamhanan ang mga tinuod g’yud nga drug lords kang kansang ngalan ilado kaayo apan gipasagdan ra sa mga tinugyanan sa balaod, ilabi na sa PDEA nga ingon sa nangatulog lang ug walay gihimo.