Sigurado ko nga adunay mga barangay kang kansang mga opisyal magbuhat-buhat lang og report nga ipadala nila sa Department of Interior and Local Government (DILG) nga kunohay duna sila’y Barangay Anti-Drugs Abuse Council (BADAC) apan ang tinuod wala diay.
Ambot kun kanus-a kaha kini aksyoni sa DILG nga silotan kini’ng maong mga opisyal nga nangilad kanila pinaagi sa pagpatuo nga aduna sila’y BADAC apan kutob ra diay sa papel.
Matud ni Atty. Paul Clarence Oaminal, ang presiding officer sa Cebu City Anti-Drug Abuse Council (CADAC), nga aron sa pag-counter sa binuang sa mga kapitan, ang DILG mo-require na nga panotaryohan og abogado ang isumiter nila nga report.
Sa ingon nga paagi, kun mamatud-an nga dili tinuod nga aduna sila’y BADAC, o kaha nagbuhat-buhat ra sila og report nga may gipahigayon sila’ng tigum apan dili diay tinuod, mahimo sila nga kapasakaan og kaso nga administratiba (dishonesty) ug kaso’ng kriminal (perjury).
Sayonan ka nga matud ni Oaminal nakabantay siya nga ang ubang mga opisyal mibutang pa nga atol sa tigum sa BADAC migasto sila og salapi sa barangay alang sa “snacks.” Pastilan, asa kaha mapunta ang mao nga kuwarta?
Adunay mga sakop sa BADAC sa pipila ka barangay dinhi sa dakbayan nga gipapanumpa ni Mayor Michael Rama atubangan sa Cebu City Hall kaniadto’ng Biyernes.
Human sa kalihukan, aduna ko’y gipangutana nga sakop sa BADAC aron sa pagsukod sa iyang kahibalo kun unsay iyang kaakohan isip sakop sa mao nga kahugpongan.
Nakapanglingo-lingo ko kay wala g’yud tawon makatubag sa akong pangutana. Ang BADAC gipangulohan sa kapitan sa barangay. Ang iyang mga sakop mao ang hepe sa mga tanod, ang konsehal nga tsirman sa committee on peace and order.
Ang ubang sakop mao ang mga presidente sa lainlaing homeowners association sa mao nga barangay, mga principal sa tunghaan nga anaa mahimutang sa barangay ug uban pa. Ang hepe sa polis sa police station nga nasakop ang mao nga barangay magsilbi nga adviser.
Sa ato pa, kun molihok ang BADAC, epektibo kaayo kay ang mga presidente sa homeowners association makatug-an man kinsa sa ilang mga lumolupyo ang nalambigit sa kalihukan sa drugas.
Ang “march against drugs” nga gihimo kagahapon gikan sa Fuente Osmeña paingon sa Plaza Independencia, gitumong aron sa pagdasig sa katawhan nga magtinabangay pakigbatok sa problema sa drugas.
Apan husto si ABC President Philipp Zafra nga ang pagsumpo sa problema sa ilegal nga drugas dili mahimo pinaagi lang sa pagpahigayon og martsa, kondili sa aktibo nga kampanya.