Ang sayop ni Binay

Klaro kaayo nga pamolitika ra g’yud ang gianhi ni Vice President Jejomar Binay dinhi sa Sugbo sukad pa kaniadto’ng Huwebes. Mahimo usab nga gigamit ra niya kini isip rason nga makalikay sa imbestigasyon sa Senado.

Apan ambot kun husto ba kaha nga “strategy” ang wala niya pagpa-interview sa mga reporters nga nagsunod-sunod kaniya ug gusto unta nga mangutana personal sa tubag niya kabahin sa mga isyu?

Kapin sa duha ka oras ko nga nagkuyog-kuyog ni Binay kagahapon pinaagi sa paglakaw gikan sa City Hall, ngadto sa Barangay Pasil ug Suba, sa wala pa mopaingon sa merkado sa Taboan.

Gihuwat nako nga si Binay mohatag unta og pakigpulong sa Taboan Public Market kay aduna may giandam nga sound system nga sipa kaayo aron magamit niya kun siya mohimo’g pamahayag.

Para kanako, dako’ng sayop ang padayong pagpakahilom ni Binay. Higayon na unta nga matubag niya ang mga isyu tungod kay buotan mangutana ang mga sakop sa media dinhi sa Sugbo.

Didto sa Barangay Suba ug Pasil, adunay daghang mga loud speakers nga gimontar sa ibabaw sa poste sa kuryente. Higayon na unta kadto ni Binay nga mapadungog niya sa katawhan sa duha ka barangay ang tubag niya sa daghang pamasangil nga naglambigit og kurapsyon.

Apan wala kini niya himoa. Human sa pagsalmot niya sa kinan-anay nga magkinamot didto sa Taboan Market, misirit ra si Binay nga miadto  sa laing destinasyon.

Nagtuo tingali si Binay nga mahanaw na ang pagduda sa katawhan kaniya pinaagi sa pagsalmot og kinan-anay nga magkinamot. Diha ka nasayop Mr. Vice President.

Tungod sa imong pagpakahilom sa isyu, mas mosamot sila nga magtuo nga tinuod ang mga report kabahin sa pagpa-overprice sa pagpatukod sa Makati City parking building ug sa usa ka school building atul sa iyang termino pagka mayor sa Makati.

Tinuod, daghang mga tawo ang milinya sa daplin sa karsada nga agian ni Binay apan wala kini magpasabot nga sila’ng tanan iyang mga       dumadapig.

Kuryoso kaayo ko mao nga gipangutana nako ang pipila sa mga milinya daplin sa karsada, labi na ang mga tiguwang. Ilang giklaro nga sila gusto lang makakita kang Binay sa personal apan wala magpasabot nga nahanaw na ang pagtuo nga tinuod ang pasangil.

Diha ko nakaingon nga ang pagdiki-diki ni Binay sa pag-atubang sa senado dili makahatag og kaayohan kaniya. Hinuon, makapasamot kini sa pagtidlum sa iyang popularity rating.