Natulog nga wa mahinanok

Ang usa sa mga balaud alang sa maayong panglawas mao ang pahuway. Dili kanang wa nay gibuhat kun dili ang pagkatulog sa kagabhion, nga ikaw nahinanok.

Wala na kinahanglana ang 8 ka oras, basta nahinanok ka lang bisa’g 4 ka oras igo na.Kay sa taas ang oras sa pagtulog apan nag-alindasay.

Unya inig mata sa buntag, kapoy ang pamati sa lawas, magluya ug maglabad ang ulo. Unsaon, mahimong nakapahuway ang lawas apan ang diwa o panghunahuna nagsige’g hasol sa utok nga wala kapahuway. Mora’g nagdibal ang konsensya sa kaguliyang sa subrang kahago nga nakapaugtas sa tulog.

Sagad sab sa mga hinungdan niini, mao ang balit-ad nga oras sa pagtulog. Inay matulog sa gabii, kanunay man magbilar sa lulinghayaw o kaha hago ang utok ug lawas sa iyang tahas sa trabaho. Dugangan pa’s mga artipisyal nga pabaskog aron lang sa kagabhion may kusog nga ilahutay.

Kun mao kini ang sagad mong buhaton, malagmit mosangpot kini sa grabeng sakit sama sa, nerbiyos, anemia o hayblad, migraine, alzheimers ug kanser. Ang linihokan mausab mora’g pahoy o luyahon.Kanunay dili nakahinultol sa buhaton. Mabalak-on ug negatibo sa mga himuong disisyon.

Busa hatagi’g maayong pag-atiman ang kabaskog sa lawas. Makausa nga madaut kini  dili na ra ba kini mabalik sa normal. Kun padayon kita sa pagpasagad nga kita ra ang maugtas sa hilabihang pag-antos sa kasakit.

Ayaw anang mentalidad nga matud pa, pareho ra kuno mamatay, may sakit o wala.

Husto apan maayo lagi kun matulog kang mamatay -kun laygayon ka sa bationg kasakit, lalim kaha? Busa mamalandong samtang may higayon pa.