EDITORYAL - Maayong pagpanaw Juan Flavier

 “Let’s DOH it!” mao kini ang battle cry kaniadto nga nahimong “household word.” Ang nagpabantog niini mao ang “gamay’ng tawo” nga si kanhi Department of Health Secretary Juan Flavier, si Flavier mitaliwan na sa laing kalibotan sayo ning semanaha.

Siya maoy nakapalig-on sa mga barangay health sectors sa mga lokalidad pinaagi sa mga programang pangmasa nga wala mahimo kaniadto sa nangaging health secretaries.

Lakip sa iyang gihingusgan kaniadto mao ang kampanya batok sa pagpanigarilyo pinaagi sa “Yosi Kadiri” campaign;  Oplan Alis Disease, Hataw na Fitness Program, National Blood Voluntary Program, Pusong Pinoy, Type Kita, Stop Breast Cancer Program, Oplan Sagip Mata ug  ang Doctors to the Barrio.

Daghang mga programa sa panglawas karon nga padayong giimplimentar ang orihinal nga naggikan sa ideya ni Flavier sa dihang siya pa ang kalihim sa DOH.

Usa na niini ang multi-vaccine national immunization campaign nga diin iyahang gigamit ang iyang abilidad sa pakigkomunikasyon aron maagni ang katawhan nga magpabakuna.

Gani bisan ang mga rebelde naagni niya sa pagsanong nga hunongon una ang giyera aron makapamakuna ang health workers sa mga hilit nga dapit.

Dihang napili siyang senador, nangamahan siya og daghang mga balaod sama sa Seatbelt Law, E-Commerce Law, Iodized Salt and Food Fortification Law, Reproductive Health ug Responsible Parenthood campaign  ug uban pa.

Unta ang mga nasugdan ni Flavier dili makalimtan  dili lang sa mga naa sa DOH kondili hasta sa publiko nga gipaninguha niya kaniadto nga makabaton og maayong panglawas.