Binay ayaw kahadlok

Mora’g ugma man kadto’ng adlawa nga si Vice President Jejomar Binay giimbitar nga patambongon sa usa ka subcommittee sa Senate Blue Ribbon Committee nga nag-imbestigar sa isyu nga naglambigit kaniya.

Lauman nato nga makahukom na unta si Binay nga moatubang aron mapaminaw sa katawhan ug matimbang-timbang kun katuohan ba ang iyang mga pamahayag kay pagka karon, daghan g’yud sa katawhan ang nangyamiid na kaniya.

Una nga pamatud-an ni VP Binay nga wala siya malambigit sa gikataho nga “overpricing” sa pagpatukod sa Makati City Parking Building nga nabaniog na kaayo sa tibuok nasud.

Ang pasangil sa kanhi bise mayor sa Makati nga si VP Binay nakadawat og bahin sa overpriced nga parking building. Kay mideklarar na man si Binay nga magpapili sa pagka presidente unya sa 2016, angay’ng limpyohon niya ang iyang ngalan.

Angay g’yud hinuon nga mahadlok si Binay nga moatubang sa mga senador kun naghuna-huna siya nga dili motug-an sa tinuod kay sigurado nga tutokan g’yud siya sa milyon-milyon ka tawo sa lainlaing dapit sa kalibutan nga motimbang-timbang kun wala ba siya mamakak.

Apan kun magtug-an lang g’yud siya sa tinuod, dili man angay’ng mahadlok si Binay. Wala g’yud hinuon makagusto ang mga tawo niini’ng pag-ukon-ukon ni Binay sa pag-atubang sa Senate Blue Ribbon Committee.

Ang tukma niya nga himuon mao ang pag-atubang sa mga senador ug pamatud-an nga wala siya’y nahimo’ng sayop sigun sa tinguha sa katawhan, kana kun tinuod nga wala siya malambigit sa pagpa-overprice sa Makati City parking building.

Unya angay usab nga tubagon ni Binay ang pasangil nga nakapanag-iya siya og kapin sa 300 hektareyas nga kayutaan, piggery ug mansyon sa Rosario, Batangas. Tungod niini’ng isyuha misamot nga ang katawhan wala na mosalig kang Binay.

* * *

Gitagalan ni Mandaue City Treasurer Regal Oliva ang mga opisyal sa dakbayan sa Sugbo nga i-settle ang ilang obligasyon nga buhis ngadto sa Mandaue kabahin sa operasyon sa ihawan sa Cebu City diha sa North Reclamation Area.

Matud ni Regal nga taas na kaayo ang tulo ka semana aron pamatud-an sa mga opisyal sa dakbayan sa Sugbo nga dili sila angay’ng pabayron og buhis nga gibana-bana nga moabot og P1.5 milyon tungod sa operasyon sa ihawan.

Ang isyu gud kay ang ihawan sa dakbayan sa Sugbo anaa man mahimutang sa dapit nga sakop na sa Mandaue. Sa yuta klaro kaayo nga “exempted” sa pagbayad og buhis ang Cebu City government, apan sa building ug sa iyang operasyon sa ihawan, dili kini exempted.

Kuyaw ni masirad-an.