Tinuod nga Bosing

Nakalili ang katawhan sa bayhon sa relasyon nilang Presidente Noynoy Aquino ug Bise Presidente Jejomar Binay sa labing uwahi nilang binayloay. Human giawhag ni Aquino si Binay sa pagbiya sa gabinete kun wa na siya makauyon sa mga gihimo sa iyang pamunoan, nitataw si Binay nga magpabilin pa siya isip kabahin sa administrasyon.

Gihimo ni Aquino ang pamahayag human sa mga pagsaway ni Binay sa iyang pamunoan. Sa ato pa, mas mahinungdanon alang niya ang iyang mga programa kay sa personal nilang relasyon ni Binay. Ang pagpabilin ni Binay nagpasabot nga, sama sa naandan, di siya sinsero. Di lang sa pagpanubag sa mga pasangil batok niya kun dili hasta sa iyang pagpanaway sa administrasyon.

* * *

Sa wa pa ning binayloay nila og sulti--nga di atubangay kun dili gipaagi lang sa media--daghang mga huhungihong sa talagsaong relasyon sa duha ka labing taas nga opisyal sa nasud. Suod silang managhigala apan managlahi ang ilang politikanhong mga partido.

Lahi sa nangaging mga bise presidente nga lahi og partido, si Binay gihatagan ni Aquino og luna sa gabinete. Di lang bisan unsang trabaho ang iyang gitugyan ni Binay. Kun dili ang pagduma gyod sa duha sa labing mahinungdanong mga gimbuhaton--pagpatuman sa housing program ug pag-atiman sa Overseas Filipino Workers (OFWs). Nga lahi sa katungdanan ni Lacson, may igong budget ug gahom.

* * *

Bisan sa ilang kasuod, nahibawo tang tanan nga di mahitabong mangampanya si Aquino alang sa kandidatura ni Binay pagka presidente sa 2016. Bisan sa pagdumili ni Aquino pagpakita sa iyang baraha, sama kaseguro sa pagsidlak sa adlaw ugma nga si Interior Secretary Mar Roxas ang opisyal nga kandidato sa administrasyon.

Klaro sab nga ang kampo ni Roxas wa mohangop sa presensiya ni Binay sa gabinete. Ni sa mga alyado ni Binay nga gipanghatagan sab og katungdanan ni Aquino sa Malakanyang. Mao nga karong mas kusganon ug mas sagunson nang mga panaway ni Binay, kusganong niawhag ang kampo ni Roxas nga palagputon na siya sa gabinete.

* * *

Apan nagmalampuson si Aquino sa pagpatuman sa labing mahinungdanong mga programa sa iyang administrasyon pinaagi nilang Binay ug Roxas. Bisan sa mga pagsaway sa iyang kataphaw, padayong gipamatud-an ni Aquino ang kahinog sa iyang liderato pagpalihok sa nagkasungi nga politikanhong mga puwersa.

Nabantang sa makadaghan na uyamot nga higayon nga silang Binay ug Roxas, bisan sa tanan nilang pamostura, di pa takos sa pagpadaplin sa ilang politikanhong panagsungi alang sa kaayuhan sa nasud ug sa katawhan. Apan napugos pagtuman sa mga gimbuhaton nga gisangon ni Aquino nila. Samtang gisubli-subli pagdeklarar ni Aquino kinsay tinuod niyang bosing, naklaro taliwa ning sibaw nga politikanhong kaguliyang kinsay tinuod nga bosing nilang Binay ug Roxas. Sa pagka karon.

 [email protected]