Mainitong pagbati!

Salamat sa mga punto nga imong gipadangat sa Editoryal, Oktubre 28, 2014. Kining among ipadangat agig tubag sa imong mga alegasyon.

1. Ang isyu kabahin sa JAO (Joint Administrative Order) wala pa mahuman. Ang gobiyernong Aquino way gihimong klarong lakang kabahin niini. Nganong among gisupak ug giduso ang pagbasura sa JAO 2014-01, D.O. 2008-39 ug Cebu City Ordinance 2207? Kini ang among mga basehanan:

a. Dili lang doble o triple ang multahan. Sa among pagkuwenta, lima ka pilo ang multahan kun ibase sa balaud sa Traffic Code.

b. Dili puwede nga ang kamandoan sa DOTC, LTO ug LTFRB mao mohulip sa RA 4136-Traffic Code of the Philippines. Ang mga magbabalaud lamang ang dunay mandato sa pagwagtang niining Traffic Code, dili ang implementing body sama sa DOTC, LTO ug LTFRB. Alang kanamo, ilegal ug unconstitutional ang maong kamandoan.

c.  Klaro sa batakang balaud, section 19, sa Bill of Rights nga dili mag-imposar og sobra-subra, dili makiangayon nga mga multa o dili makitawhanong mga silot.

d. Walay klaro kun kinsay makabayad sa giingong multahan sa colorum nga madakpan nila nga mga sakyanan.

Nagpaduso kami nga wagtangon na kining kamandoan ug ang RA 4136 maoy ipatuman.

Laing punto nga among ipaklaro:

Nikuyog kami sa gihimong serye nga mga protesta sa PISTON tungod kay tataw kanamo ang isyu. Alang kanamo, dagko ra kaayo ang multa nga gipahamtang pinaagi sa JAO. Modugang kini sa uyamot na daan nga kahimtang namong mga drivers. Halos di man gani moigo ang kitaon sa matag adlaw.

Wala magpahimulos ang PISTON sa iyang mga sakop. Klaro namo nga kinahanglan pakigbisogan ang dili makiangayon nga kamandoan.

Ang gihimo sa PISTON nahasubay sa legal ug lehitimong paagi. Ang pagprotesta kabahin sa atong mga katungod nga anaa sa batakang balaud.

Ang PISTON isip usa ka progresibong pundok sa mga drivers ug operators, hugot nagtuo nga pinaagi sa hiniusang paglihok makab-ot ang kadaugan.

Wala’y mahitabo kun maghulat lang kun unsay desisyon sa kadagkoan sa LTO, LTFRB ug DOTC. Gikinahanglan ang makanunayong pakigbisog ug pagpaduso sa lehitimong demanda.

Kung alang sa uban panghadlok kanamong mga drivers ang JAO, alang kanamo, usa kini ka tinubdan sa korapsyon.

Ang mga isyus nga gipakigbisogan sa PISTON lehitimo. Samtang wala’y klaro ug paborableng aksyon ang anaa sa kagamhanan, magpadayon ug magpadayon ang pakigbisog alang sa among katungod sa panginabuhian. Bisan pa kun alang sa uban “mura’g plakang buak.”

Kanimo matinahuron,

Greg Perez, Coordinator, PISTON-Cebu