Ang salamin

Ang salamin maoy usa ka butang nga halos kada higayon ato kining lilion, aron sa pagsuhid sa kaugalingon. Mao kini ang modiskitar kun wala bay ikasaway diha sa pagsud-ong sa atong dagway. Motug-an kini sa tinuod mong makita kay repleksyon man ni sa kaugalingon kun unsa ka, ikaw gayud kana.

Daghan pa ang wala kaayo makaamggo sa tinuoray nga kapuslanan sa salamin. Sagad sa atong naandan, gigamit lang nato kini sa paghindik sa pisikal nga kahimtang sa kaugalingon. Kun may buling o nakabalda sa panan-aw, detalyadong hapsayon dayon ni aron mas madanihon sa mga tumatan-aw. Apan nataligam-an ang pagtukib o pagsuhid mahitungod sa kahiladman, sa atong kinaiya o pagkatawo.Angay unta nga samtang nagsud-ong sa atong panggawas nga dagway, ato usab mapalandongang tukmang isul-ob nga mga maayong hiyas o gawi, nga kini maoy mas makahimo kanato nga madanihon sa pakiglambigit sa isi’g katawo. Maantigong makigduyog o mopahiluna sa mga nagsumpaking baruganan. Linihokan ug sinultihang makapabugnaw sa kainit.

Ang salamin igo lang sa pagpakita sa kamatuoran, apan atoa ang katungod sa paglihok kun unsay gusto nato nga mahitabo sa kinabuhi. Kun pananglitan wala kay pakabana sa salamin, dako usab ang epekto ini kanimo. Magkayamukat o mangahibat ang dagway ug ang katibuk-an sa pagkatawo mo. Mao kana ang repleksyong makita sa isig katawo, mawala ang ilang respeto. Moidlas ang mga kahigayonan sa paglambo sa atong mga pangandoy.

Busa iseguro usab ang salamin nga dili hibat, kay ato ra ba kini kanunay dangpan sa pagpahiangay nga mahimo tang madanihon sud-ongon sa uban.