Angay g’yud nga tumanon dayon sa kapolisan ang kamandoan ni DILG Secretary Mar Roxas nga molihok sila aron madakpan na ang mga “most wanted” nga mga tawo.
Kinahanglan nga i-pressure g’yud ni Roxas ang kapolisan aron pangitaon ug dakpon nila ang mga most wanted persons nga padayong nagtago-tago nga mora’g gipasagdan lang sa mga polis.
May katungod si Roxas nga mositar sa kapolisan kay ang PNP ubos man sa DILG ug isip DILG Secretary si Mar Roxas mao usab ang naglingkod nga chairman sa National Police Commission.
Daghan g’yud ang nakasaway sa kapolisan kay wala gayud sila makadakop sa mga most wanted persons lakip na ni Ruben Ecleo, ang lider sa PBMA nga diha’ng hapit na makonbikto, nagtago-tago na.
Nagtuo hinuon ang kadaghanan nga si Ecleo anaa ra g’yud nagluklok sa isla sa Dinagat, Surigao del Norte, ilabi na sa lungsod sa San Jose. Ang nakaapan lang kay mapanagan-on kaayo ang kapolisan.
Kun saligan lang nimo ang kapolisan nga nadistino sa San Jose, Dinagat Island, ayaw na lang g’yud pagtuo nga madakpan nimo si Ecleo. Saludo g’yud ko niadto ni Chief Superintendent Alberto Olario nga maoy regional director sa PNP Caraga-Region.
Nahinumdom mo nga si Olario maoy mimando nga sulngon sa kapolisan ang mansyon ni Ecleo didto sa San Jose ug misangpot sa pagkasikop ni Ecleo.
Kay kuwang man og kaisog ang kapolisan didto sa Caraga Region pagka karon, mao nga si Mar Roxas na lang ang nangunay paghatag og kamandoan.
Alang kanako angay’ng mauwaw niini ang kapolisan sa Caraga ug angay’ng daygon si Mar Roxas sa pagpaninguha nga masikop na ang mga most wanted persons.
Balik kang Ecleo, nailad niya ang korte nga napatuo nga kun dili siya tugotan nga makabutang og pyansa mahimo’ng anha siya mamatay sa bilanggoan.
Tiaw mo nga giisip na siya nga “walking time bomb” nga nagpasabot nga inihap na lang ang oras sa iyang kinabuhi. Ilad g’yud kay tan-awa, dako pa’ng buhi si Ecleo.
Siyaro, sa kadaghan sa kapolisan ug sa ilang mga tigpaniid wala g’yuy nakatug-an kun asa magtago si Ecleo? Kun madakpan na gani si Ecleo, dili na g’yud angay’ng magpailad pa ang huwes.
Bisan og moingon pa ang iyang mga doktor nga mamatay na si Ecleo pagka ugma, dili sila angay’ng magpadala sa ilad.