Our place in Batangas

Abi ba nako kadto og nakahukom na si Vice President Jejomar Binay pag-atubang sa mga sakop sa Senate Blue Ribbon Committee nga nag-imbestigar kabahin sa mga isyu nga naglambigit kaniya, mora man og nahadlok na ‘sab.

Nabasa man gud nako sa Philippine Star kagahapon ang report nga si Binay nakadawat na sa imbitasyon gikan sa senado nga patambongon kini sa hearing karong Nobiyembre 6, apan iya pa man diay kuno nga timbang-timbangon kun maayo ba.

Aw, mosamot g’yud hinuon nga ang katawhan magduda nga tinuod nga adunay gusto’ng tagoan si Binay mao nga dili siya moatubang sa Senate Blue Ribbon Committee.

Kun makakita lagi ko og news bahin ni Binay, basahon na g’yud nako kay naikag na kaayo ko niini’ng mao nga isyu. Unya, ang usa sa mga anak ni Binay mi-post og hulagway sa iyang Instagram kabahin sa kontrobersyal nga 350 hektareyas nga gitumbok nga Hacienda Binay.

Sa mao nga post nga nahimo sa wala pa mobuto ang isyu, ang anak ni Binay nagkanayon “Our place in Batangas.” Apan karon gitangtang na kuno. Kun imong sumpay-sumpayon ang mga detalyi, makapanglingo-lingo ka g’yud.

Mao kini nga angay gayud nga si Binay moatubang sa senado ug dili siya angay’ng mahadlok kun wala man siya’y gitagoan.

Tan-aw hinuon sa katawhan karon nga nadutlan na si Binay kay nakigtagbo man gani siya ni Presidente Aquino sa pamasin nga makatabang kaniya ang presidente nga hunongon na ang imbestigasyon.

Nagtuo man gud si Binay nga si DILG Secretary Mar Roxas may kalambigitan sa pagpagawas sa mga “expose” batok kaniya. Gitan-aw man gud ni Binay nga si Roxas maoy lig-on niya nga ikakontra sa eleksyon karong 2016.

Sayon ra kaayo ang himuon ni Binay kun dili man tinuod ang pamasangil kaniya nga gihimo sa kanhi bise mayor sa Makati kabahin sa giingon nga “overpricing” sa pagpatukod sa Makati City Parking Building.

May mitug-an nako nga duna kuno’y gilusad nga Oplan batok ni Mar Roxas. Nakalimot hinuon ko unsa to’y gisulti sa akong amigo. Basta kay pangontra kuno kini sa nadungog nga Oplan Stop Nognog 2016.

Ang “Nognog” nag-refer kang Binay tungod sa kolor sa iyang pamanit. Buyno, walay nagpugong ni bisan kinsa pagbutyag og mga dili maayo nga buhat batok ni Mar Roxas, kana kun aduna man.

Kun tinuod man nga si Mar nagtinguha pa nga mag-presidente, angay usab siya nga hashasan sa katawhan. Apan pagka karon, maisip nga humot pa kaayo si Roxas sa katawhan.