EDITORYAL - Cash Assistance katungod ba ni?

Bulahan ang mga senior citizens sa dakbayan sa Sugbo  tungod sa P12 mil nga pinansyal nga hinabang gikan sa siyudad.  Di pa lang dugay, nakadawat sila og P2 mil nga unang migawas nga P4 mil ug nakapalibog na hinuon sa mga tawo ug nabutang sa bati nga posisyon ang mga naa sa city hall.

Lisod na man patuohon ang mga tawo sa tinud-anay nga eksplinasyon, kay ang kwarta lahi ra gyud og epekto sa hunahuna sa tawo.

Duna na say mga senior citizens nga nangreklamo sa plano ni Mayor Michael Rama nga ang P6 mil cash ug ang nahibiling P6 mil in kinds ug mga maintenance medicine nila.

Samtang tinuod nga bisan sila mahimo man nga mao na lay mopalit sa ilang tambal nga panginahanglan gamit ang cash assistance, apan duna g'yuy uban nga miangkon nga nagduda silang dunay makasapi niini sa city hall kung tambal na lang maoy ihatag.

Duna na usab bag-ong gitinguha karon, ang nahibilin pang dawatonon kuhaan og tag P2 mil aron idonar alang sa katukoran sa Cebu City Medical Center (CCMC).Giingong 500 na gikan sa 60 mil ka rehistradong seniors ang mipirma og pag-uyon niini.

Kung matinuod kini dako kaayo kining  tampo gikan sa mga sakop sa Office of the Senior Citizens Affairs (OSCA). Labing menus P120 milyones nga donasyon gikan sa seniors ang mapuno sa nagkuwang nga pundo sa CCMC.

Maayo kini nga legasiya kung matinuod, total, karon lang man ning tuiga nila buhaton apan molanat og pipila ka mga katuigan ug daghan pa nilang mga apo ang makabenepisyo niini nga tambalanan.

Angay hinumdoman sa mga senior citizens nga ang cash assistance nga gihatag sa siyudad dili "right" o katungod, kondili pribelihiyo lamang. Mahimo kining wagtangon kung but-on sa siyudad.