EDITORYAL – Hagit kang Mayor Rama

Angay’ng daygon ang gihimo nga lakang ni Mandaue City Mayor Jonas Cortes nga paghimo og paspas nga paghawan sa daplin sa Mahiga Creek nga sakop sa iyang teritoryo.

Ang dakbayan sa Sugbo maoy nagsugod sa pagpanglimpyo sa daplin sa Mahiga Creek nga sakop sa siyudad apan naundang kini sulod sa milabay’ng mga buwan.

Gituman ni Mayor Cortes ang hagit ni Mayor Michael Rama nga hawanan usab ang daplin sa sapa habig sa Mandaue mao nga gipaspasan niini sa pagpangguba ang illegal structures nga anaa sa ilang habig.

Kay gipaspasan man sa Mandaue ang ilang obligasyon, angay usab nga ang mga opisyal sa dakbayan sa Sugbo maninguha usab nga dili langay-langayon ang ilang trabaho.

Sa Mandaue wala kita makadungog nga adunay mga opisyal sa ilang dakbayan nga nagbabag-babag nga kunohay labanan ang katungod sa mga hingtungdang pamilya nga mosangpot ra sa pagkalangay sa paghawan sa daplin sa sapa.

Unta kini usab maoy himuon sa atong mga opisyal dinhi sa dakbayan nga dili nila sakyan ang isyu sa paghawan sa daplin sa Mahiga Creek kay sa paghimo niini mosangpot man og kaayohan sa kadaghanan.

Kun molapad na pagbalik ang Mahiga Creek, mahimo na kini nga tawgon og Subangdaku River ug ang gubot kaayo nga sapa mahimo na nga kabahin sa bati nga kasaysayan ug kakuhaan og leksyon nga dili maayo ang pagpasagad.

Kay gipasagdan ra man sa mga opisyal sukad pa kaniadto maoy hinungdan nga gatusan ka pamilya ang nakatukod og kabalayan daplin sa kasapaan. Ang uban mihimo og “riprap” nga nakapagamay pag-ayo sa agianan sa tubig.