Dili maayo ang pamakak nga maoy atong himuong kinaiya. Tungod kay maghatag kini og kadaut sa imong imahe, isip maayong tawo. Sa Dios, dulomtanan kini sa iyang panan-aw. Sa tawo, mosamot kang maalaut, kay sila mawad-an man og pagsalig kanimo. Mokunhod ang oportunidad nga imong kapahimuslan gikan sa mga nagtuo nga ikaw matinud-anon.
Sa namakak, makaayo ni kaniya, segun sa iyang katarungan ngano kini iyang gihimo. Mahimong nakalingkawas sa sirkumstansya nga basin makompromiso siya. Apan ang epekto niini sa gibakakan, dili lalim nga langkatan ka sa katungod nga masaligan. Makaguba ni sa malaumon mong kinabuhi.
Sagad, sila motamiid ug likayan ka ingon sa may sakit nga mananakod, ang magkahigos ka sa kapait nga imong antuson ang pagkabakakon. Hinuon, may situwasyon nga makapamakak ka aron makatabang sa isig ka tawo, tingali may konsiderasyon nga masabtan kita.
Sama sa usa ka masakiton nga may tagal na sa kinabuhi. Iyang gibakakan, gidasig ug gihatagan og paglaom.
Tuod man, nahimong tinuod ang bakak niya.Nabuhi pa hangtud karon ang gibakakan. Kun wa pa siya mamakak, segurado atakehon na kini sa kasingkasing ug maoy mahimong hinungdan sa kamatayon niya. Daghan pang mga situwasyon nga mapugos kita sa pagpamakak, alang sa kaayohan sa uban.
Apan di gyud ni maayo kun mamakak kita sa pagpamentaha sa uban ug pagpahimulos sa katungod nga dili atoa. Nga kab-oton ang kaugalingong interest nga ikadaut usab sa uban. Nga naglaum sa imong pagkamatinud-anon nga makig-alayon sa katarong sa mga pangalagad sa isig katawo ug sa Dios.