Tinuod nga relihiyon

Akong tubagon ang pangutana ni Mr. P. Nuñez sa email: ”Sa radio miingon ka ang malampusong ginikanan mao kadto’ng nakapalampos og kurso sa ilang anak ug nakatudlo og tinuod nga relihiyon, unsay basehanan?”

Alang sa Espada sir, limitado ang atong pagpuyo sa yuta labing taas 100 ka tuig, busa aron may achievement ta, sigurohon nato nga may profession ang atong anak ug labaw sa tanan natudloan nato og husto’ng relihiyon una kita mamatay.

Usa ka problema kun daghan ka og anak, unya wa pa’y siguro kun tinuod ba ang imong relihiyon.

Busa kun manganak ka, bana-banaa lang sa imong kinitaan nga masiguro nimo nga makapalampos ka kaniya o kanila sa ilang kurso.

Kun wala ka kaseguro sa imong relihiyon, pangitaa usab ang tinuod nga relihiyon samtang may kinabuhi pa ikaw aron ikatudlo nimo sa imong anak o mga anak.

Para sa Espada ikaduha lang ang edukasyon, ug angay unahon ang relihiyon. Kun anaa ka na sa tinuod nga relihiyon ug masunod kini sa imong anak o mga anak, inigbalik ni Cristo, mag-uban mo sa imong anak ngadto sa langit.

Apan kun ikaw ug ang imong anak wala sa tinuod nga relihiyon, gitataw sa Biblia nga itambog ka sa impiyerno uban sa imong kaliwatan nga wala mangita sa relihiyon nga tinuod samtang buhi pa kamo dinhi sa yuta.

Hinuon kun ikaw ug ang imong pamilya anaa na sa tinuod nga relihiyon nga mabasa sa Biblia, usa na lang ang imong paningkamotan, nga mamatay ka nga nakapalampos pagpa-eskuyla sa imong anak ug mao kini ang misyon nga angay tumanon sa usa ka ginikanan. ([email protected])