EDITORYAL – Tungason paagason

Matinud-anong serbisyo ang gikinahanglan sa publiko gikan sa mga tawo nga gusto’ng mangalagad. Tubig maoy labing gikinahanglan sa katawhan. Mas bentaha pa nga walay kuryente kay sa walay tubig. Nindot ang programa karon sa Metro Cebu Water District (MCWD) nga ubos sa pagdumala nila ni Chairman Rene Mercado ug General Manager Ernie Delco kay gisugdan na nila pag-atiman ang pagsuplay og tubig sa mga nagpuyo sa “upland areas.”

Mihugyaw sa kalipay ang mga lumulopyo sa Upper Sitio Fatima, sakop sa Barangay Apas diha nga miabot ang mga kawani sa MCWD ug misugod pag-instalar og dagko nga mga linya.

Mga 40 ka pamilya nga sa dugay na nga katuigan nag-antos sa pagbayad og mahal kaayo’ng tubig gikan sa mga nagnegosyo nga mibaligya og ‘tag P75 ang cubic meter ang makalingkawas na sa ilang mga pag-antos.

Tukma kaayo ang proyekto sa MCWD nga palambuon nila ang pagserbisyo diha sa mga ibabaw nga bahin dinhi sa dakbayan aron makatilaw sa barato nga presyo sa tubig ang mga kabus nga lumolupyo.

Sa upat pa ka tuig nga nahabiling termino sa tsirman sa MCWD, ug sa maayo’ng pagserbisyo sa bag-ong general manager sa water district, daghan pa kaayo ang ilang maalagaran.

Sa pagkonektar nila og daghang linya sa tubig ngadto sa panimalay sa mga konsumidor nagkahulogan kini og dugang kita sa MCWD ug makapasamot sa iyang paglambo.

Adunay panultihon nga nagkanayon, “Ang lihok maoy pasultihon, dili kay ang sulti maoy pabuhaton.”