Dear Atty. Divine,
Dunay kabilin nga yuta ang among lolo. Unom ang iyang anak ug ang akong papa ang kamaguwangan. Sa diha’ng namatay ang akong lolo ilang gibahin pinaagi sa Extra Judicial Partition ang yuta mao nga nahulog na nga co-owners sila’ng unom sa maong property apan wa pa g’yud kini ma-subdivide. Apan tungod kay kasagaran kanila wa magpuyo dinhi sa Cebu ang ilang kamanghuran nga igsuon maoy ilang gitudlo nga administrator. Duna kini balay nga paabangan ug ang maong property anaa mahimutang sa commercial district. Niadto’ng miagi’ng tuig namatay ang administrator. Ang akong amahan patay na usab lakip na ang iyang mga igsuon. Karon ang nagpahimus sa maong property ang mga anak ra sa administrator wa gani mi bahini. Gusto namo karon nga kuhaon ang among share, unsay angayan namong buhaton? - Tony
Dear Tony,
Mas maayo nga sultian ninyo ang mga anak sa imong tiyo nga maoy nag-occupy ug nagpahimus sa property nga gusto na ninyo’ng kuhaon ang inyo’ng share pinaagi sa pag-subdivide niini. Kun magmagahi sila sa paghatag sa inyong bahin, mahimo ninyo sila’ng ireklamo sa barangay aron kamo’ng mga heirs magkaatubang. Kun di g’yud mo maareglo sa barangay then wa g’yud mo’y laing mahimo gawas sa pagdangop sa korte pinaagi sa pagpasaka og petition alang sa Judicial Partition ug ang korte na ang mobahin sa maong kabilin kaninyo’ng mga legal heirs. Thanks and God bless. - Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.