Pipila kanato ang wala pa kaayo masayod sa epekto, nga kining negatibong emosyon makaapektar sa atong maayong panghunahuna. Kay mao na man lang permi ang kapungot o kalagot, sa tawong gikasilagan pag-ayo, nga di gayud mawala sa panumdoman ang makaitok nga kasuko o ang pagdumot.
Sa bibliya, si Hesucristo nag-ingon nga"Apan ako nag-ingon kaninyo, nga nakadungog kanako; Higugmaa ang inyong kaaway, buhata ang maayo niadtong may kasuko kaninyo, bendisyoni kadtong nagtunglo ninyo, i-ampo kadtong naghimaraut kaninyo. (Lukas 6:27-28)"Kini ang himsog, kinabuhing kristohanon.
Mahimong wala kita'y pasidungog madawat, sa paghigugma nato niadtong nahigugma kanato. Apan may madawat kitang ganti sa kahitas-an niadtong nahigugma sa kaaway. Kini usab ang makapahimsog sa atong espirituhanong obligasyon, nga tiunay ug malinawong makigdaiton sa isig katawo.
Matud sa uban maglisud sila sa paghimo ini. Unsaon ang garbo man maoy nagmando sa atong disisyon. Kun di ka gayud kahimo, mosumbalik kining madaut ang panglawas mo. Nga sa sige'g utas sa pagdumot, kalagot, kasuko ug uban pang negatibong emosyon, ma-stress ug ma-depress ka ug mawad-an kag higayon nga magmalinawon sa imong kinabuhi. Kay makasakit sab ni'g kanser.
Hinuon, aron ka makatuman ini, higalaa ang kaaway, nga sa ingon makakat-on ra ikaw nga maanad higugmaon ang kaaway. Pagkaanindot sa palibot nga wala na kita'y maisip nga kaaway kun di ang lunlon na nga gugma sa isig katawo.