Bisan og di mag-road sharing

Sukad, livable gayud ang Cebu. Nindot kaayo’ng puy-an. Kini tungod kay ang mga lumad nga Sugbuanon, mga buotan g’yud, pwera buyag.

Kun buot huna-hunaon, ang Sugbuanon nga kinaiya ug batasan, ang atong personalidad, ang atong pagkamaabi-abihon, ang pagkamahigalaon, maoy nakapa-livable sa Cebu. Dili ang traffic, dili ang basura, dili ang baha’, dili ang kahagip-ot sa kadalanan, dili ang kamahal sa gasolina, kondili, ang tawo mismo, ikaw ug ako, maoy nakapa-livable sa Cebu.

Kay kun buot huna-hunaon, duna pa may mas daghan nga mga dakbayan ug lalawigan sa nasud nga mas nindot pa’ng tan-awon kay sa atong Sugbo. Busa, it’s the people ang rason - ang atong pagka-unique. Mao man gani hinungdan nga daghan na kaayo’ng taga-laing dapit nga ania na manimuyo uban kanato.

Daghan kaayo’ng mga kauban namo kanhi sa ARENA 7, mga opisyal sa mga buhatan nga national nga taga-laing dapit, apan sa ilang pag-retire, dinhi na mopuyo sa Sugbo, kay alang nila maayo g’yud kaayo puy-an ang atong dapit. Kita’ng mga Sugbuanon maoy nakapa-livable sa Cebu. Bisan pa og mapuno ang atong kadalanan sa mga skywalk, bisan og dili pa kita mag-road sharing, magpabilin nga livable ang Cebu.

Kun kinahanglan man nga mag-road sharing, kay matud sa uban ang dalan gibuhat alang kuno sa tanan ug dili kay para lang sa mga sakyanan, busa kinahanglan sirhan ang kabahin sa dalan aron ang mga maglakaw ug magbisekleta makagamit usab sa dalan. Pastilan

Di ‘sab sila mosugot nga adto mag-road sharing sa SRP kay mingaw kuno, kay kinahanglan g’yud adto sa populated area aron nga daghan ang mahasol. Sa SRP, sila ra ang magtikaw-tikaw ug alang kanila, dili road sharing, tungod kay gamay ra nga mga sakyanan ang mo-share sa dalan. Pastilan.

Di ba mahimo nga magsuroy-suroy sila, bisa’g kada adlaw, subay sa gipa-nindot nga sidewalk sa Osmeña Blvd, gikan sa Capitol hangtud sa junction sa P. del Rosario?

Kun anha sila maglakaw sa sidewalk walay dalan nga sirhan, padayon ang pagdagan sa mga sakyanan, ug sila usab sige ang paglakaw-lakaw. Walay ma-inconvenient.

Mao kini ang tinuod nga road sharing, kay ang sidewalk, part man sa road. Everybody happy, dili kay sila ra ang ma-happy.